ABŞ-dan Rusiya-Ukrayna müharibəsi ilə bağlı şok iddia gəlib. Təqaüdçü general, təhlükəsizlik üzrə ekspert Mark Hertlinq Rusiyanın bir çox bölgələrdə müdafiəyə keçdiyini bildirib.
Alp.az Musavat.com-a istinadən bildirir ki, “British Express” qəzeti bu xəbəri “Ukrayna Putinin pis idarə olunan və pis təlim keçmiş qoşunlarını geri addım atmağa məcbur etdi” başlığı ilə oxucularına təqdim edib.
Bir vaxtlar ABŞ-ın Avropa və Yeddinci Ordu komandanı vəzifəsində çalışmış 68 yaşlı Hertlinq qəzetə açıqlamasında Rusiya quru qoşunlarının yaxşı idarə olunmadığını, zəif təlim keçdiyini və ordunun mənəvi-psixoloji vəziyyətinin çox aşağı olduğunu bildirib.
Rusiya ordusunun şəxsi heyət və texnika baxımından Ukraynadan əhəmiyyətli dərəcədə geri qaldığını deyən Hertlinq bildirib:
“Rusiya bu müharibəyə “bir neçə günə başa çatacaq səhra fırtınası” kimi yanaşaraq başladı. Lakin, bu, xəyal idi. Xəyalı gerçəkləşdirmək üçün rus ordusunun rəhbərliyi, təlimi və avadanlıqları yox idi”.
Hertlinq vurğulayıb ki, itkilərin yerini doldurmaq üçün Rusiyaya uzun zaman lazım olacaq.
Qeyd edək ki, Rusiya aylardır hərbi itkiləri açıqlamaq istəmir. Moskva bununla bağlı ilk və son rəsmi bəyanatını martın 2-də verib. Sözügedən açıqlamada Rusiyanın müharibədə itirdiyi hərbçilərin sayı 498 göstərilir. O vaxtdan bəri bu məlumat yenilənməyib.
Lakin bu yaxınlarda Rusiyanın hərbi itkiləri ilə bağlı ABŞ-dan diqqətçəkən açıqlama gəlib.
ABŞ müdafiə nazirinin siyasi məsələlər üzrə müavini Kolin Kahl keçirdiyi brifinqdə bildirib ki, münaqişə zamanı 70-80 min rus əsgəri ölüb və ya yaralanıb.
