Zərdab rayonunun sakinlərinə aid olan ərazi – örüş sahəsi saxta sənədlər əsasında bir neçə nəfərə satılıb.
Zərdab rayonu Qoşaoba qəsəbə sakinləri bu iddianın yer aldığı məktubla Alp.az-a şikayət ərizəsi ilə müraciət ediblər.
Məktubda bildirilib ki, Zərdab rayon İcra Hakimiyyətinin birinci müavini Rəhman Feyzullayev, onun qardaşı oğlu Tapdıq Feyzullayev və ayrı-ayrı vaxtlarda Qoşaoba kənd Bələdiyyəsinin sədri vəzifəsində çalışmış şəxslər bələdiyyəyə aid örüş torpaqlarını saxta sənədlərlə özəlləşdiriblər.
Daha sonra həmin sənəd müxtəlif şəxslərə satılaraq, dövlət əmlakı məqsədli şəkildə istismar edilib. Yəni torpaqların qanunsuz şəkildə istifadə edilməsi və icarəyə verilməsi ilə qazanılan böyük məbləğdə pul vəsaiti mənimsənilib.
İndi qəsəbə sakinləri həmin mənimsənilmiş məbləğin bələdiyyə hesabına qaytarılmasını və kəndin ehtiyacları üçün istifadə edilməsini tələb edirlər:
“Zərdab Bələdiyyəsinə aid olan əkin və örüş torpaqları Qoşaoba kəndi ərazisindədir. Mal-qara üçün ayrılmış örüş torpaqları müxtəlif vaxtlarda bələdiyyə sədri işləmiş şəxslər və uzun müddətdir ki kənd icra nümayəndəsi işləyən icra başçısının birinci müavini Feyzullayev Rəhmanın qardaşı oğlu Feyzullayev Tapdıq tərəfindən qeyri-qanuni yollarla, dolayısı ilə saxta sənədlərlə guya özəlləşdirilib. Arayışdan belə görünür ki, 600 ha örüş torpağı boşdur, istifadə edilmir. Camaat o torpağdan 1 ha belə istifadə edə bilmir. Boş torpaq yoxdur. Qoşaobada əhalinin sayı 2492 nəfər göstərilməyinə baxmayaraq, arayışda əhali sayı 1800 nəfər göstərilibdir.
Göstərilən 720 ha örüş torpağı vəzifəli şəxslər ətrəfindən öz aralarında bölüşdürülüb istifadə edilir. Hətta öz şəxsi mülkləri kimi başqalarına “icarəyə” verib pulunu mənimsəyirlər. Bu səbəbdən bələdiyyənin hesabına 1 manat da ödənilmir. Torpağın çox hissəsi, 500 ha hazırda icra başçısının birinci müavini işləyən Rəhman Feyzullayevin ixtiyarındadır. Sürət Hüseynovun komandası ilə vəzifəyə gələn R.Feyzullayev 30 ildir müavin, birinci müavin vəzifələrindədir. Çünki o vəzifədən getsə çox işlərin, saxtakarlıqların üstü açılacaq. R.Feyzullayevin torpaqdan qazancı 1 milyon manata yaxındır ki, bu məbləğ bələdiyyənin hesabına ödənilməli idi.
720 ha x 60,0 manat = 43,200 man.
43.200 x 25 il = 1.080.000
Saxta arayışlardan birini sizə göndəririk:
Göründüyü kimi arayış qeydiyyat kitabından keçməyib, tarix yoxdur, nömrə yoxdur. Harada görünüb ki, iki idarə (dövlət və qeyri-dövlət) eyni arayışa imza atıb möhürlə təsdiq etsin.
Xahiş edirik, bələdiyyəyə aid olan torpaq və örüş sahələrinin kimlər tərəfindən istifadə olunduğu yoxlanılsın, mənimsənilmiş pullar bələdiyyə hesabına ödənilsin ki, bərbad olan yollarımız düzəlsin”.
Sakinlərin iddiası ilə bağlı digər tərəfin mövqeyini də dərc etməyə hazırıq.
Alp.az
