Dostları onun çox danışmayan, sakit bir insan kimi xarakterizə edir. İdmançı cüssəli, bu igidin bu gün doğum günüdür. Əslində Murad bir yaz günündə doğulsada istini sevməzdi deyir, yaxınları… Şəhid Xüsusi Təyinalımız Murad Gözəlov 12 may 1995-ci ildə Neftçalanın Həsənabad qəsəbəsində doğulub. 2001-2010-cu illərdə Şəmsəddin Orucov adına Həsənabad qəsəbə tam orta məktəbdə təhsil alıb. 2010-cu ildə Azərbaycan Dövlət Neft və Sənaye Universitetinin nəzdində Bakı Neft-Energetika Kollecinə Neft və Qaz emalı fakültəsinə qəbul olub. 2014-cü ildə kollec təhsilini bitirərək hərbi xidmətə yollanıb. Tərtər şəhərinin Xüsusi Təyinatlı Kəşfiyyat taborunda müddətli həqiqi hərbi xidmət keçən Murad Baş kəşfiyyatçı kimi xidmət edir. M.Gözəlov 2016-cı ildə hərbi xidməti uğurla başa çatdırdıqdan sonra müxtəlif vəzifələrdə çalışır. 2018-ci ilin mart ayından “Neftçala Operating Company LTD” şirkətində operator olaraq işə başlayır. Karyerasında daim uğur qazanan Murad neftin hazırlanması və sabitləşdirilməsi üzrə mütəxəssis vəzifəsinə yüksəlir. 2020-ci ildə Ali təhsil müəssisələrinə qəbul imtahanları zamanı arzusunda olduğu Azərbaycan Dövlət Neft və Sənaye Universitetinin Neft-Qaz Mühəndisliyi fakültəsinə qəbul olur.
Baş kəşfiyyatçı Murad Gözəlov 2020-ci il sentyabrın 20-də könüllü təlimlərə qatılır. Sentyabrın 27-də başlanan 2-ci Qarabağ müharibəsi zamanı kəşfiyyat qrupunda döyüşən Murad mərdliyi, rəşadəti ilə seçilib, döyüşün fəal iştirakçılarından olub. Bütün dostlarına Şuşada görüşəcəklərinə söz verən Murad, bu dəfə andına sadiq qala bilmədi. O, oktyabr ayının 30-da Qubadlı uğrunda gedən döyüşlərdə qəhrəmancasına şəhidlik zirvəsinə yüksəlib, noyabrın 5-də Neftçalada dəfn olunub. Şəhadətindən sonra M.Gözəlov “Vətən uğrunda”, “Cəbrayılın azad olunmasına görə”, “Qubadlının azad olunmasına görə” medalları ilə təltif edilib.
Ruhu şaddır!
