image-ads_2000x150
image-261016066_1542394442792299_8277962990517281535_nbackend

Zəfəri bizə yaşadan qəhrəman: Şuşa uğrunda döyüşdə tarix yazan hərbiçimiz 

image-ads_728x90

44 günlük Vətən Müharibəsində öz qəhrəmanlığı ilə dastan yazan oğullarımızdan biri də Faiq Qasımovdur. Bu gün şəhid Faiq Qasımovun doğum günüdür.

Şəhid Qasımov Faiq Mayıl oğlu 1983-cü il noyabrın 27-də Beyləqan rayonu Bolsulu qəsəbəsində anadan olub. 1990-cı ildə birinci sinfə gedən Faiq 2001-ci ildə Akif Cavadov adına Bolsulu kənd tam orta məktəbin 11-ci sinfini bitirib.

2002-ci ilin yanvarında Beyləqan rayonunun hərbi komissarlığı tərəfindən həqiqi hərbi xidmətə çağırılan Faiq Bakı şəhərində yerləşən Hərbi Dəniz Qüvvələrinin “N” saylı hərbi hissəsində matros kimi xidmət edib. 2003-cü ildə xidmətini başa vuran qəhrəmanımız bir müddət müəyyən işlərdə çalışsa da, 2007-ci ildə yenidən hərbi xidmətə qayıdıb. Sənədlərini “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək Beyləqan rayonununda yerləşən “N” saylı hərbi hissədə xidmətə başlayıb. Təxminən 9 il müddətdən artıq həqiqi hərbi xidmət hərbi qulluqçusu kimi xidmət edən Faiq 2016-ci ildə sənədlərini “Gizir hazırlığı” kursuna verib. İmtahanlardan müvəffəqiyyətlə keçib kursu bitirdikdən sonra “gizir” rütbəsi alıb.

O, əvvəl işlədiyi hərbi hissədə xidmətinə davam edib. Gizir Qasımov Faiq xidməti ərzində dəfələrlə yuxarı komandanlıq tərəfindən orden və medallarla təltif edilib.

Faiq 2016-cı ilin aprel ayının əvvəllərində başlayan, böyük zəfərimizin başlanğıcı olan Aprel döyüşlərində də iştirak edib. Beləliklə, 13 ildən çox stajı olan təcrübəli hərbçi gizir Qasımov Vətən müharibəsində də ən öndə gedənlərdən olub. Düşmənin birinci və ikinci eşalonunu keçib 29 sentyabrda yaxınlığına düşən minomyot mərmisindən qəlpə yarası alaraq döyüş meydanından çıxarılıb hospitala göndərilib. Lakin o, həkimlərin və ailə üzvlərinin təkidinə baxmayaraq, tam sağalmamış müalicəsini yarımçıq qoyaraq yenidən döyüşə yollanmışdır. Füzuli, Cəbrayıl, Qubadlı, Xocavənd və Şuşa uğrunda gedən döyüşlərdə qəhrəmanlıqla iştirak edib.
Ailəsi ilə sonuncu dəfə oktyabrın 31-də əlaqə saxlayan Faiq müharibənin sonuncu günündə – 9 noyabrda Daşaltı istiqamətində şəhid olub. Şəhidimizin nəşi ailəsinə 17 gün sonra-noyabrın 26-da təhvil verilib, elə həmin gün də Beyləqan rayonunun Şəhidlər Xiyabanında uğrunda canını fəda etdiyi vətən torpağına tapşırılıb.

Faiq ailəlidir, onun Əli və Hüseyn adlı iki oğlu var.

Hərbi qulluqda olduğu müddətdə “Qüsursuz xidmətə görə”,”Azərbaycan Respublikası Silahlı Qüvvələrinin 95 illiyi (1918-2013) ” və “Azərbaycan Ordusunun 100 illiyi (1918-2018)” yubiley medallarına layiq görülən gizir Qasımov Faiq Mail oğlu ölümündən sonra isə döyüş əməliyyatları zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda” və “Şuşanın azad olunmasna görə” medalları ilə təltif edilib.

Ramil Hikmət

Loading...
image-ads_728x90

  • whatsapp
  • messenger
  • telegram
  • vkontakte
  • odnoklassniki