Azərbaycan Respublikasının müvəqqəti olaraq Rusiya hərbi kontingentinin nəzarətində qalan Xankəndi şəhərindəki haylar 3 gündür gündüz və axşam saatlarında ölkəmizin suverenliyi və ərazi bütövlüyü əleyhinə mitinqlər keçirir.
Alp.az “Kavkazski uzel” nəşrinə istinadla xəbər verir ki, Xankəndində Ermənistanla sərhəddəki son qanlı toqquşmalardan sonra başlanmış etiraz aksiyaları dünən də davam edib. Etirazçıların dünənki əsas tələbi separatçı-terrorçu rejimin başçısı Araik Arutyunyanın onların qarşısına çıxıb baş verənlərə aydınlıq gətirməsi olub. Amma Araik meydana çıxmayıb.
O da məlum olub ki, separatçı və revanşist xislətli ermənilərin gözlədiyinin əksinə olaraq, Xankəndindəki etirazçı hayların sayı gündən-günə azalır.
Bunu mitinqçi Anastas İsraelyanın çıxışı da sübut edir. O, bildirib ki, mitinqdə heç bir “hakimiyyət” nümayəndəsi olmayıb.
Tarix müəllimi Hasmik Aruşanyan çıxışı isə separatçı ruhda olub:
“Biz meydanda ona görə varıq ki, biz də əcdadlarımızın uzun əsrlər boyu yaşadıqları kimi öz torpağımızda yaşamaq istəyirik. Yalnız xalqın öz taleyini həll etmək hüququ var. Ermənistanın Qarabağın statusu ilə bağlı sənədi imzalamaq hüququ yoxdur. İstənilən sənəd qanunsuzdur. Bütün beynəlxalq qurumlara müraciət edəcəyik ki, öz müqəddəratını təyinetmə tələblərimizi bilsinlər”.
(moderator.az )
