“Artıq Azərbaycan uzunmüddətdir ki, erməni silahlı birləşmələrinin, Ermənistan Müdafiə Nazirliyinin Birinci Əlahiddə ordusunun korpusunun, həmçinin Araik Harutyan, Vitali Balasanyan və digərlərinə tabe olan Dağlıq Qarabağdakı separatçı silahlı birləşmələrinin ərazidən çıxarılmasına, tərkisilah olunmasına dair tələblər irəli sürüb. Bu tələblər də 10 noyabr 2020-ci ildə imzalanmış üçtərəfli bəyanatdan irəli gələn məsələdir. Həmin bəyanatın 4-cü bəndində erməni silahlı birləşmələri rus sülhməramlı qüvvələrinin Qarabağa daxil olması ilə paralel olaraq ərazidən çıxarılması öhdəliyini icra etməlidir. Lakin bu indiyədək icra olunmayıb. Çox az hissəsi Ağdam, Kəlbəcər və Laçın ərazisindən çıxarıldı, ancaq Qarabağın dağlıq hissəsində qaldılar”.
Alp.az-ın məlumatına görə, bu fikirləri Demokrat.az-a açıqlamasında hərbi-siyasi ekspert Ramil Məmmədli deyib. O qeyd edib ki, son iki il ərzində erməni silahlı birləşmələri Qarabağ ərazisində davamlı olaraq təxribatlar törədiblər:
“Ümumiyyətlə, mən Qarabağa səfərimdə də gördüm ki, erməni hərbi birləşmələri sözün əsl mənasında müharibə hazırlığının mərhələsindədirlər. Belə olan təqdirdə Azərbaycan Ordusunun adekvat addım atmaqdan başqa yolu yoxdur. Yəni ordumuzun antiterror əməliyyatı keçirməkdən başqa yolu yoxdur. Əgər Ermənistan öz hərbi birləşmələrini ərazilərimizdən çıxarmasa bu baş verə bilər. Başqa bir məsələ Ermənistan doğurdanmı, öz hərbi birləşmələrini oradan çıxaracaq? Doğurdanmı, erməni silahlı birləşmələri, separatçılar oradan çıxarılacaq? Mən şəxsən tezliklə bu hadisənin baş verəcəyinə inanmıram. Çünki əksinə Qərb və Rusiyanın bəzi qüvvələri onlara dəstək verməkdədir. Daha dəqiq Araik Harutyan xətti ilə Nikol Paşinyan və Qərb qüvvələri Fransanın verdiyi dəstək çərçivəsində, yəni sonuncu Fransa Senatının qətnaməsini əsas götürərək Qarabağdakı ermənilərə sanki bir stimul verirlər. Nəinki orada yaşamaq, hətta orada qondarma bir qurumun formalaşdırılması üçün bir stimul verirlər. Bundan başqa, Ruben Vartanyan və Vitali Balasanyan xətti ilə Rusiyanın da bəzi dairələri Qarabağdakı separatçılara öz dəstəklərini nümayiş etdirirlər. Biz Xankəndində sonuncu aksiyada, mitinqdə bunu açıq şəkildə gördük. Hesab edirəm ki, bütün bunlar Qarabağ daxilində Qərb və Rusiya klanı arasında qarşıdurmadır. Yəni, Araik Arutunyan Qərb, Ruben Vartanyan və Vitali Balasanyan isə Rusiya xətti olaraq qarşıdurmadadırlar. Bu, daxili məsələlərdir. Amma, ümumillikdə Azərbaycana qarşı çox böyük aqressiya hiss olunur və buna da hazırlıq hiss olunur. Bu baxımdan ermənilərin Qarabağ ərazisindən hər hansı hərbi birləşmənin çıxaracaqlarına inanmıram”.
Onun sözlərinə görə, vəziyyət getdikcə gərginləşir və bu da bölgə üçün sülh vəd etmir:
“Hesab edirəm ki, proseslər lokal da olsa qarşıdurmalara doğru aparır və Ermənistanın qeyri-konstruktiv mövqeyi də bundan xəbər verir. Hər halda qarşıda gələn bir ay, ay yarım ərzində, təxminən yanvar ayına qədər biz bu məsələlərlə bağlı bəzi məsələlərin aydınlaşacağına ümid edirik. Lakin mən şəxsən düşünmürəm ki, qarşıda gələn 2 ay ərzində Ermənistan özündə siyasi iradə nümayiş etdirib sülh müqaviləsinə imza atar və Qarabağ ərazisindən silahlı birləşmələrini çıxarda”.
