Hörmətli millət vəkilimiz Cavanşir Feyziyevin şəkili tələbələrlə görüşündən çəkilən fotoları görüb çox təsirləndim. Ümumiyyətlə Cavanşir müəllimin tələbələrə diqqət və qayğısı, həssaslıqla yanaşması çox yüksək təqdirə layiqdir. Bir insan gərək o qədər böyük ürəyə, mərhəmətli qəlbə, yüksək insani keyfiyyətlərə sahib ola ki, onlarla, yüzlərlə tələbənin təhsil haqqını ödəməyi, onların qayğısına qalmağı özünə borc bilə. Mövzu həmin şəxsin maddi durumunun yaxşı olub, olmamasından getmir. Maddi durumu yaxşı olan elə milyonçular tanıyıram ki, bir dəfə də olsun bir yetimin qəlbini sevindirməyiblər.
Mən hər zaman deyirəm ki, Cavanşir müəllim sadəcə Şəki sakinlərinin deyil, Azərbaycanın hər yerindən ona müraciət edən, ondan yardım istəyən hər kəsin vəkili, hər kəsin atasıdır. Cavanşir müəllim imkansız ailələrin, ödənişli şərtlərlə ali məktəblərə qəbul olunan aztəminatlı gənclərin ümid yeridir və hətta deyərdim ki, son ümid yeridir. Bəzi ataların övladlarına göstərmədiyi qayğını, etmədiyi yaxşılıqları Cavanşir Feyziyev həmin gənclərə, həmin tələbələrə edib. Dəyərli millət vəkilimizin dəstək olduğu, təhsil haqqını ödədiyi tələbələr sırasına mən də daxil olduğum üçün, bu yazını yazmağı özümə borc bildim. Cavanşir müəllim bizim üçün ona görə dəyərlidir, əzizdir, əvəzolunmazdır ki, o etdiyi yaxşılıqları hər zaman təmənnasız, heç bir mənfəət güdmədən, reklamsız edib. Şəxsən mən özüm və eləcə də digər insanlar etdiyimiz hər bir xeyriyyə işini hər zaman işıqlandırırıq. Lakin, Cavanşir müəllim bu qədər böyük xeyriyyə işləri görür, ancaq heç birini heç vaxt işıqlandırmır. Cavanşir müəllim yüksək insani keyfiyyətlərə sahib, qibtə olunası nümunəvi insandır. O gözəl ailə başçısı, qayğıkeş ata, nəvələrinə gözəl babadır.
Cavanşir müəllim hələ deputat olmamışdan əvvəl müəllim-alim və xeyriyyəçi bir iş adamı kimi həmişə gənclərimizin ali təhsil almasında maraqlı olduğunu nümayiş etdirib. Ziyalı ailəsində doğulub boya-başa çatmış deputat bu maraqla da artıq 20 ildən çoxdur ki, ali məktəblərə ödənişli şərtlərlə qəbul olunmuş tələbələrə dəstəyini davam etdirir.
Deputatın bu layihəsi əvvəllər yalnız ata-ana qayğısından məhrum olan tələbələrə aid olsa da, sonralar daha da genişlənib, şəhid ailələrinin, qazilərin, aztəminatlı və imkansız ailələrin övladlarını da əhatə edib. Bu müddət ərzində yüzlərlə şəkili gənc deputat Cavanşir Feyziyevin qayğısı ilə həm ölkəmizin ali məktəblərində, həm də xaricdə təhsil alıblar. Odur ki, uzun illər ərzində onunla himayə etdiyi gənclər arasında könül körpüsü yaranıb və deputatın gənclərlə görüşləri ənənə halını alıb.
Lamiyə İsazadə
İctimai fəal
