44 günlük Vətən Müharibəsində qəhrəmanlığı ilə dastan yazan oğullarımızdan biri də şəhid Emin Məmmədovdur. Bu gün şəhid Emin Məmmədovun anım günüdür.
Şəhid Məmmədov Emin Fazil oğlu 1997-ci il oktyabrın 11-də Beyləqan rayonunun Birinci Şahsevən kəndində zəhmətkeş kəndli ailəsində dünyaya gəlib. O, 2005-ci ildə Fazil Miriyev adına Araz qəsəbə tam orta məktəbin 1-ci sinfinə daxil olub.
Emin uşaqlıqdan vətəninə, torpağına sevgi ilə böyüyüb. Göz açdığı mühit, yaşadığı zaman, ətrafında cərəyan edən hadisələr isə, onda hərb sənətinə xüsusi maraq yaratmışdır. Ona görə də o, həmişə hərbçi olacağını deyirdi. 2016-cı ildə 11-ci sinfi bitirən Emin məzun günündə bayrağımızı məktəbin ən uca yerindən asıb, sonra isə fəxrlə hər zaman bayrağımızı ucaldacağını söyləyib. Emin məktəbi bitirdikdən sonra 2016-cı ilin iyulunda Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Beyləqan rayon şöbəsi tərəfindən ordu sıralarına çağırılıb. Tərtər rayonunda yerləşən “N” saylı hərbi hissədə xidmətə başlayan Emin düşmənlə üzbəüz səngərlərdə şücaəti, qətiyyəti, vətən sevgisi ilə xidmət etmiş, ayıq-sayıq döyüş növbətçiliyi aparıb. Hərbi xidmətini uğurla başa vuraraq öz doğma kəndlərinə qayıdıb. Artıq onun uşaqlıq arzusunu reallaşdırmağın vaxtı gəlib çatmışdır. Lakin Dövlət Sərhəd Xidmətinə sənəd verən Emin ilk cəhdində uğursuzluğa düçar olur və işi düzəlmir. Bir müddət kənddə təsərrüfat ilə məşğul olur. Ancaq o, hərbçi olmaq istəyindən də vaz keçmirdi. Hərbçi qardaşı Vaqifə tez-tez suallar verər, ondan nələrsə öyrənməyə çalışardı. İlk müraciətindən sonra ikinci və üçüncü cəhdində də işi alınmayan Emin “Azərpambıq ASK” MMC-nin Beyləqan pambıq emalı zavodunda işə düzəlib. Lakin imtahanlardakı uğursuzluqlar onu ruhdan salmamışdı. Buna görə də, o, 2020-ci ilin may ayında sənədlərini Silahlı Qüvvələrin “Müddətdən artıq həqiqi hərbi xidmət hərbi qulluqçularının hazırlığı” kursuna verib. Kursu uğurla bitirərək Beyləqan rayonunda yerləşən “N” saylı hərbi hissədə qumbaratan əsgər kimi xidmətə başlayıb.
Hərbi xidmətinin ilk ayı çətin təlimlərdə olan Emin dəfələrlə sınaqdan çıxıb “Təlimdə tər, döyüşdə zəfər” deyimini unutmurdu. O, ən mürəkkəb tapşırıqları müvəffəqiyyətlə yerinə yetirir, döyüş qabiliyyəti, yeni silah sistemlərindən və döyüş texnikasından istifadə etmək bacarığı ilə fərqlənirdi. Vətən müharibəsinin ilk günü sentyabrın 27-si səhər Emin təmsilçisi olduğu hərbi hissənin tərkibində Füzuli rayonunun Alxanlı kəndindən Qaraxanbəyli istiqamətində döyüşlərə atılıb. Onlar böyük itkilər hesabına olsa da, qısa müddət ərzində düşmənin müdafiə səddini keçib Qaraxanbəyli kəndini işğaldan azad etmişdirlər. Bu döyüşlərdə fəallığı ilə seçilən Emin həm də yaralı və şəhidlərimizi döyüş meydanından çıxarmaq üçün ən çətin və keçilməz yerlərdən keçərək, yoldaşlarının köməyinə çatırdı. Vətən uğrunda can alıb-can verən, döyüşlərdə fərqlənməyi bacaran Emin oktyabr ayında təminat üçün Beyləqana gələrkən qardaşı Etibarla görüşüb. O, həmin görüşdə qardaşına üzərində daşıdığı bayrağı verib deyir:”Anama de bu bayrağı ən uca yerdən assın”.
Müharibənin irəliləyən günlərində ən ağır döyüş əməliyatlarına qatılan Emin Füzuli rayonunun düşmən tapdağından azad edilməsindən sonra Qubadlı, Xocavənd və Şuşa uğrunda gedən döyüşlərdə iştirak edib. O, heç zaman ruh yüksəkliyini aşağı salmır özünə və döyüş yoldaşlarına motivasiya verirdi. Sonuncu döyüşündən əvvəl özünün çəkdiyi kadrlarda Eminin gülə-gülə “Onsuz da, öləcəyik” deməyi isə ölümə gülən əsgərimizin həm də hər şeyə hazır olduğunun göstəricisidir.
Noyabrın 2-də Daşaltı istiqamətində hərəkət edən Eminin də içərisində olduğu maşın kalonu düşmən artilleriyasının atəşinə məruz qalmışdır. Ön sırada avtomobildə olan Emin vurularaq yanan maşından sağ çıxmağı bacarır. Onlar 6 nəfərlik iki qrupa bölünüb düşmənin hədəfindən yayınmağa çalışırlar. Lakin o, düşmənin arası kəsilməyən artilleriya atışları nəticəsində yaxınlığına düşən mərmidən qəlpə yarası alaraq sol ayağını itirir. Özü ağır vəziyyətdə olan qəhrəmanımız yaralı döyüş yoldaşı Qocayev Elvinə kömək edib onu xilas etsə də, özü qanitirmədən şəhid olur. Silahdaşları şəhidimizin nəşini noyabrın 3-də döyüş meydanından çıxara bilir. O, noyabrın 6-də doğulub boya-başa çatdığı kənddə uğrunda canını fəda etdiyi vətən torpağına tapşırılmışdır. İndi şəhidimizin hər zaman ən yüksək zirvədə görmək istədiyi üçrəngli dövlət bayrağımız işğaldan azad edilmiş torpaqlarımızda qürurla dalğalanır.
Emin subay idi. Ailədə dörd qardaş idilər.
Qorxmazlığı və şücaəti ilə adını tariximizin şanslı səhifəsinə yazan əsgər Məmmədov Emin Fazil oğlu ölümündən sonra iştirak etdiyi döyüş əməliyyatlarında və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərəncamları ilə “Vətən uğrunda” və “Qubadlının azad olunmasına görə” medalları ilə təltif edilib.
Ramil Hikmət
