44 günlük Vətən Müharibəsində nəinki tək Şimali Azərbaycanda. eləcə də Cənubi Azərbaycanda yaşayan soydaşlarımız həssas bir bir diləklə həmrəy oldu.
Arzuları isə yalnız Azərbaycan Ordusunun qalibiyyəti idi. Özünü bu yurdun övladı sayan, dünyanın müxtəlif köşəsində yaşayan bütün azərbaycanlılar da bu həmrəyliyin, arzunun daşıyıcısı oldular. 44 günlük müharibə dövründə Amerikada yaşayan və Azərbaycanı ləyaqətlə təmsil edən soydaşlarımızın fəaliyyəti də diqqətimizdən yayınmadı. Yəqin ki, hələ müharibədən əvvəl, daha dəqiq Tovuz döyüşlərindən sonra ermənilərinxarici ölkələrdə aqressiv fəaliyyətini unutmamısınız. Həmin günlərdə Azərbaycanın Los Anceles şəhərindəki səfirliyinin önündə gənclərimiz ermənilərlə üz-üzə gəldilər və yenə də ermənilər öz vəhşiliklərini nümayiş etdirərək soydaşlarımızı təhqir edib milli qürurumuza bir daha toxunmuş oldular. Üç mindən çox erməni 50 nəfərdən də az olan azərbaycanlılara hücum ediblər. Azərbaycanlılar “Qarabağ bizimdir!”, “Can Azərbaycan!”, “Sülhü pozmarıq” şüarları ilə gəzərkən ermənilər buna əsəbləşiblər və hücum etdilər . Sosial şəbəkələrdə yayılan kadrlardan görünür ki, ermənilər o qədər vəhşiləşmişdilər ki, polislər də aciz qaldılar.
Həmin vaxt ABŞ –da Azərbaycanı təmsil edən xeyli saylı soydaşımız həyatlarını riskə ataraq meydanlardan çəkilmədilər. Sonuna qədər Azərbaycanın haqq işinə dəstək oldular , dünyanın mərkəzindən əsl gerçəkləri hayqırmağa çalışdılar.
Belə soydaşlarımızdan biri də Azərbaycanda da vətənpərvərliyi, cəsarəti ilə tanınan Ülkər Gidnerdi.
TANIŞLIQ: Ülkər xanım 1980-ci il aprelin 12-də Şabran rayonunda dünyaya gəlib. Tibb texnikumunu bitirdikdən sonra ailə qurub, Amerikaya köçdüyü üçün təhsilini orada davam etdirib. Polis akademiyasına daxil olub və yüksək nəticələrlə ofiserlik qazanıb. O, üç şeir kitabının və bir neçə mahnının müəllifidir. Bundan əlavə, Ülkər hər zaman öz həmvətənlərinə dəstəkdir. Bir çox ailələrə yardım edir, onların problemləri ilə maraqlanır. Ülkər xanım, eyni zamanda online fəaliyyət göstərən “Ülkər” TV-nin rəhbəri, maliyyəçisidir. Qeyd edək ki, İkinci Qarabağ savaşı dönəmində kanalın əməkdaşları, bir çox şəhid və qazi ailələri ilə görüşmüş, mövcud durumu işıqlandırmışlar. Ülkər, həmçinin online fəaliyyət göstərən “Qarabağ” və “Ağdam” TV-nin də maliyyə dəstəkçisi olub. Ailəlidir, 3 övladı var. İllərdir Amerikada yaşasa da, hələ də Azərbaycan vətəndaşıdır. Amerikada yaşayan məktəbli və gənclərə Azərbaycan mədəniyyəti və adət-ənənələrinin öyrənilməsi, milli-mənəvi dəyərlərin təbliğatında Ülkərin böyük xidmətləri vardır.
Ohayo ştatındakı böyük müsəlman məscidinin girişində asılmış müsəlman dövlətlərinin bayraqlarının yanına Azərbaycan bayrağını görmədikdə məyus olan, bunu qəbullanmayan, ağıllı, məntiqli diktəsi ilə məscidin axundunun əli ilə Azərbaycan bayrağını o bayraqların yanına ucaltdırmağı bacaran Ülkər xanım! Hər addımında, hər cümləsində amalı Azərbaycan uğruna bir iş görmək, yaşadığı ölkədə Azərbaycanı layiqincə tanıtmaq, tanımayanları maarifləndirmək, təbliğat aparmaq və bütün gördüyü işlərdən zövq alamaq Ü. Gidnerin həyat prinsipidir. Bundan əlavə həm mənəvi dəstəyi, həm də halal maaşi ilə imkansız soydaşlarımıza göstərdiyi maddi yardımı ilə soydaşlarının rəğbətini qazanıb.
Bir neçə gündür Azərbaycanda qonaq olan soydaşımız bir qrup ictimai fəalla da görüşdü, söhbətlər apardı, planlarından danışdı. “Müharibə Veteranları Qadınlarına Sosial Yardım” İctimai Birliyinin sədri Radə Abbas, Türkiyə Beykent Universitetinin əməkdaşı, İran məsələləri üzrə analitik Dr. Gülarə Yenisey, Siyasi fəal və yazar Elyaz Yekenli , “Demokratik Cəmiyyət və Qadın Hüquqlarının Müdafiəsi” İctimai Birliyinin sədri Mehriban Abdullayeva , I və II Qarabağ müharibələrinin bir neçə iştirakçısı, gənc fəal Firəngiz Əkbərli, jurnalist Qoşqar Salmanlı, şəhid ailəsi Ceyran Əzizova və başqaları Ülkər xanımla görüşdə, həmçini tanışlıqdan məmnun qaldıqlarını bildirdilər.
Yeri gəlmişkən, söhbət əsnasında məlum oldu ki, Ü. Gidner həm də incə ruhlu şairədir. Xeyli şeirin müəllifidir və poeziyası ilə bağlı 2 kitabı işıq üzü görüb. Hətta Azərbaycan Yazıçılar Birliyinə həmin kitablarından da hədiyyə edib. Şairə xanımdan öyrəndik ki, kitablarının Azərbaycanda təqdimatını keçirmək arzularından biridir.
Azərbaycanım
Yad eldə yaniram bir çıraq kimi,
Torpağına qurban Azərbaycanım!.
Göz yaşım qurusa qalmasa izi,
Qanımla yazaram Azərbaycanım!
Bu sonsuz dünyada sınaqlardasan,
Bəlalı yerin var, alovlardasan.
Qartalsan, zirvədə yuvalardasan,
Günəşə boy atan Azərbaycanım!
Qürbət bahar olsa, sənə tay olmaz,
Yad dildən səsimə, gələn hay olmaz.
Min nübar gətirsə biri pay olmaz
Cənnətdir hər guşən Azərbaycanım!
Qeyd edək ki, tədbirin sonunda Ülkər Gidner “Müharibə Veteranı Qadınlarına Sosial Yardım” İctimai Birliyinin “Fəxri Diplom”una layiq görüldü.
Azərbaycan uğrunda addım atan hər kəsin yolu açıq olsun!
Əntiqə Rəşid
