Fevralın 24-də Rusiya Silahlı Qüvvələri tərəfindən Ukraynaya qarşı başladılan genişmiqyaslı xüsusi hərbi əməliyyat Ukrayna şəhərlərinin, hərbi obyektlərinin dağıdılması və Ukraynanın müdafiə olunması ilə davam edir.
Fevralın 28-də Rusiya ordusu Kiyevin müdafiəsini yarmaq cəhdini davam etdirib. Rus qoşunlarının kolonnaları dəfələrlə paytaxt ətrafına basqın etməyə cəhd ediblər. Ukrayna hərbçiləri fevralın 28-də yerli vaxtla saat 00:00-dan sonra Kiyev vilayətinin Makarov şəhəri yaxınlığında düşmənin texnika karvanını mühasirəyə alıblar. Ukrayna Müdafiə Nazirliyi bildirib ki, Rusiya Ordusu Ukraynanın hərbi və mülki aerodromlarını, hərbi idarəetmə məntəqələrini, hava hücumundan müdafiə obyektlərini, mülki infrastruktur obyektlərini, müdafiə zonalarında yerləşən yaşayış məntəqələrini və bölmələrini atəşə tutmaqda davam edib. Nazirliyin məlumatına görə, fevralın 28-də Ukrayna ordusunun artilleriya atəşi nəticəsində Rusiyanın hərbi texnika və canlı qüvvəsindən ibarət 5 kalon məhv edilib.
Ukrayna silahlı qüvvələri gün ərzində yaşayış məntəqəsini zəbt etməyə cəhd edən rus qoşunlarını Donetsk vilayətinin Volnovaxa şəhərindən çıxarıb. Mariupol şəhəri müdafiəni davam etdib, Zaporojye vilayətinin Berdyansk şəhəri Rusiya silahlı qüvvələrinin nəzarətinə keçib.
Kiyev və Xarkovda yenidən partlayış səsləri eşidilib. Rusiya ordusu Herson vilayətindəki Yeni Kaxovka şəhərini, Jitomir və Çerniqov şəhərlərində yaşayış binalarına raket zərbələri endirib, reaktiv sistemlərindən atəşə tutub.
Günün ikinci yarısından başlayaraq, Rusiya ordusu Ukraynanın Xarkov şəhərini “Qrad” atəşinə tutub. Ukraynanın Daxili İşlər Nazirliyi bildirib ki, işğalçı qüvvələrin təcavüzü nəticəsində onlarla dinc sakin həlak olub, 100-dən çox yaralı var. Xarkov şəhərində fevralın 28-də yerli vaxtla saat 16:00-dan martın 1-i saat 06:00-dək komendant saatı tətbiq olunub.
Ukrayna Müdafiə Nazirliyi döyüşlərdə Rusiya Silahlı Qüvvələrinin məhv edilən silah və texnikalarının, eləcə də hərbi qulluqçularının sayını açıqlayıb. Bildirilib ki, fevralın 24-dən bu günədək Ukrayna ordusu Rusiya silahlı qüvvələrinin 29 təyyarəsini, 29 helikopterini, 191 tankını, 816 zirehli texnikasını, 74 topunu, 291 hərbi avtomobilini, 3 pilotsuz uçuş aparatını, 1 “Buk” ZRK-sini, 5 ədəd hava hücumundan müdafiə sistemini, 21 ədəd “Qrad” yayılım atəşli reaktiv sistemini, 60 sistern və 2 ədəd gəmi/qayığını məhv edib. Habelə, Rusiya Ordusunun 5300-dən çox hərbiçisi döyüş meydanında öldürülüb.
Ukrayna Hərbi Hava Qüvvələri Rusiyanın Jitomir vilayətində “BuK” zenit-raket kompleksini (ZRK) Türkiyə istehsalı “Bayraktar TB2” pilotsuz uçuş aparatı ilə məhv edib. Ukrayna mətbuatı iddia edir ki, indiyədək azı 2 ədəd “Buk-M1-2” raket sistemi, 1 ədəd “Tor-M2” hava hücumundan müdafiə sistemi, 4 ədəd 152mm-lik “Msta-B” haubitsası, 14 ədəd yük avtomobili “Bayraktar TB2” PUA ilə məhv edilib.
Vladimir Putin müdafiə naziri və Silahlı Qüvvələrin Baş Qərargah rəisinə nüvə qüvvələrinin döyüş hazırlığı vəziyyətinə gətirilməsinə dair əmr verib. Rusiyanın müdafiə naziri Sergey Şoyqu bildirib ki, bu məqsədlə, fevralın 28-də Rusiyanın Raket Qoşunları, Şimal və Sakit Okean donanmaları və Uzaqmənzilli Raketli Aviasiya Komandanlığı gücləndirilmiş heyətlə hazır vəziyyətə gətirilib.
Avropa İttifaqı Rusiyanın işğalçılıq siyasətinə qarşı Ukraynaya hərbi yardım olaraq 450 milyon avro dəyərində hərbi təyyarə və digər hərbi texnikalar, eləcə də 50 milyon avroluq yanacaq və müdafiə vasitələri göndərməyi planlaşdırıb. Avropa İttifaqı Komissiyasının sədri Ursula Von der Leyen bildirib ki, Aİ birbaşa silah almayacaq, lakin üzv ölkələrdən Ukrayna ordusuna satınalmaların həyata keçirilməsinə maliyyə dəstəyi göstərəcək. Aİ, həmçinin Rusiya təyyarələrinin Aİ-nin hava məkanına girişini qadağan edəcək və 27 ölkənin blokuna daxil olan Rusiyanın dövlət mediası “Russia Today” və “Sputnik”, eləcə də onların törəmə şirkətlərinə qadağa qoyacaq. Xanım Von der Leyen Aİ-nin Belarusa da Rusiyaya qarşı tətbiq edilən sanksiyalara bənzər sanksiyaları genişləndiriləcəyini bildirib. Onun sözlərinə görə, Belarus Prezidenti Aleksandr Lukaşenko Ukraynaya qarşı bu qəddar hücumda şərikdir və buna görə də Belarusa tədarük edilən mineral yanacaq, tütün, ağac, sement, polad, dəmir və digər məhsulların ixracına qadağa qoyulacaq.
“Böyük Yeddilər” qrupunun (G7) ölkələri Ukraynaya müdafiə silahları, hərbi texnika və maliyyə yardımını davam etdirmək və Rusiyaya qarşı sanksiyaları genişləndirmək barədə razılığa gəliblər.
Danimarka Rusiya-Ukrayna müharibəsi ərəfəsində kömək məqsədilə könüllü hərbi dəstərlərini Ukraynaya göndərib. Danimarkanın Baş naziri Mette Frederiksen bildirib ki, ölkə vətəndaşları Ukraynada Beynəlxalq Terrordan Müdafiə Legionuna qoşula bilərlər. Onun sözlərinə görə, ukraynalı hərbçilərə Danimarkadan 2 700 ədəd tank əleyhinə qumbaraatan və sursat göndərəcək.
Rumıniya hökuməti də Ukraynaya hərbi texnika və sursat göndərəcək. Ukrayna Silahlı Qüvvələrinin Baş Qərargah rəsmi “Facebook” səhifəsində bildirilib ki, Rumıniya hökumətinin sözçüsü Dan Kerbunaru Ukraynaya hərbi texnika və sursatla yanaşı yanacaq və dəyəri 3 milyon avrodan çox olan tibbi avadanlıq və dərmanların ikinci tranşı ilə də kömək edəcəklərini deyib. Rumıniya hökuməti, həmçinin yaralı ukraynalıları hərbi hospitallara yerləşdirməyə hazır olduğunu bildirib.
Rumıniya Ukraynaya sursat və hərbi texnika ilə yanaşı yanacaq və 3 milyon avro dəyərində tibbi avadanlıq və dərmanların ikinci tranşı ilə kömək edəcək. Latviya Seymi ölkə vətəndaşlarına Ukrayna uğrunda döyüşməyə icazə verib.
Ukrayna nümayəndə heyəti Rusiya nümayəndələri ilə danışıqlarda iştirak etmək üçün Ukrayna-Belarus sərhədi ərazisinə gəlib. Nümayəndə heyətlərinin görüşü Ukrayna sərhədi yaxınlığında, Pripyat çayının sahilində Qomel vilayətində keçirilib. Prezident Vladimir Putinin köməkçisi Vladimir Medinski Rusiya Ukrayna ilə danışıqlarda hər iki tərəfin maraqlarına cavab verən razılığa gəlməkdə maraqlı olduğunu bildirib.
Ukrayna Prezidenti Volodimir Zelenski Avropa İttifaqından yeni xüsusi prosedura əsasən dərhal üzv olmağı xahiş edib.
Habelə, Ukrayna Prezidenti döyüşməyi bacaran məhbusları azad edib.
Bu gün Ukrayna Prezidenti Rusiya əsgərlərinə çağırış edib: “Artıq 4500 rus əsgəri öldürülüb. Niyə hamınız bura gəlmisiniz? Silahlarınızı qoyun və gedin. Komandirlərinizə etibar etməyin. Sadəcə gedin və canınızı qurtarın”.
Rusiya Müdafiə Nazirliyinin sözçüsü general-mayor İqor Konaşenkov öz növbəsində Kiyevin mülki vətəndaşlarına müraciət edərək bildirib ki, Kiyev-Vasilkov magistral yolu ilə şəhəri tərk edə bilərsiniz, bu istiqamət açıq və təhlükəsizdir.
Hazırda Böyük Britaniya, Kanada, Polşa, Çexiya, Bolqarıstan, Estoniya, Latviya, Litva, Rumıniya, Sloveniya, Belçika, Danimarka, Finlandiya, Almaniya, İslandiya, İrlandiya, İtaliya, Avstriya, Portuqaliya, İsveç və Niderland, Albaniya və s. hava məkanlarını Rusiya təyyarələri üçün bağlayıb. Onlara İspaniya və Şimali Makedoniya da qoşulub. Ümumilikdə 32 ölkə Rusiya aviaşirkətləri və təyyarələri üçün hava məkanını bağlayıb. Xatırladaq ki, Rusiya təyyarələri üçün səmanı bağlayan ilk ölkə fevralın 26-da gecə yarısından etibarən Polşa olub.
Bu gün ABŞ döyüşlərdən zərər çəkmiş ukraynalılara 54 milyon dollar humanitar yardım ayırdığını bildirib. Bu vəsait beynəlxalq humanitar təşkilatlara əhalinin ərzaq, içməli su ilə təminatı, yaşayış yerlərinin təşkili, təcili tibbi yardımın göstərilməsi və mühafizənin təmin edilməsi üçün göndəriləcək. Vəsaitin təxminən 26 milyonu Dövlət Departamenti, 28 milyonu isə ABŞ Beynəlxalq İnkişaf Agentliyi (USAID) tərəfindən ayrılacaq. Bundan əvvəl Ukraynaya zenit və tank əleyhinə silahlar da daxil olmaqla 350 milyon ABŞ dolları məbləğində əlavə hərbi yardım ayrılacaq.
İtaliya xarici işlər və beynəlxalq əməkdaşlıq naziri Luici Di Mayo bildirib ki, İtaliya hökuməti Ukraynaya 110 milyon avro dəstək verəcək. Həmin vəsaitlər Ukrayna əhalisini və iqtisadiyyatını dəstəkləmək üçün istifadə olunacaq.
Qeyd edək ki, Ukrayna ordusu sıralarında xidmət edənlər arasında müqavilə əsasında azərbaycanlılar da var. Hətta onlardan biri Xarkovun azad edilməsi uğrunda döyüşlərdə yaralanıb.
Ukranyadakı vəziyyətlə əlaqədar Ruminiyaya keçən Azərbaycan vətəndaşlarının bir qismini Bakıya gətirilib. Bolqarıstan Azərbaycan vətəndaşlarının Ukrayna ərazisini münaqişə səbəbindən tərk etməsini nəzərə alaraq, onlara münasibətdə ölkə ərazisindən tranzitlə keçmək üçün müvəqqəti olaraq viza tələbini ləğv edib. Ukraynadakı vəziyyətlə əlaqədar Moldovaya gələn daha 174 nəfər azərbaycanlı bu gün Rumıniyaya keçirilib. 30 nəfər azərbaycanlı Xarkov şəhərindən Ukrayna-Polşa sərhəddinə evakuasiya edilib. Azərbaycan hökuməti Ukraynanın Odessa şəhərində cəmləşən 6 yük nəqliyyat vasitəsinin Moldovaya keçidini təmin edilib. Qeyd edək ki, ötən gün Xarkov şəhərinin atəşə tutulması nəticəsində 3 azərbaycanlı sürücü xəsarət alıb.poliqon
