Bu gün Ukraynada müstəqillik günüdür. Adətən bütün xalqlar müstəqillik günündə öz həmvətənlərindən və digər müstəqil ölkələrin xalqlarından təbriklər alır, bu günü ilin ən böyük bayramı kimi ruh yüksəkliyi şəraitində qeyd edirlər. Ukraynalılar isə məhz bu gün onların yaşadıqları şəhər və kəndlərin daha amansız şəkildə atəşə tutulacağına hazırlaşır, zirzəmilərə çəkilərək təcavüzdən qorunmağa çalışırlar. Ukrayna xalqı dövlət müstəqilliyinin bərpa olunmasının 30 illik yubileyini müharibə şəraitində qarşılayır.
Ukraynada baş verənlər onu göstərir ki, 1991-ci ildə ləğv olunmuş SSRİ-nin dağılma prosesi bir sıra keçmiş İttifaq üzvləri üçün hələ də başa çatmayıb. Ukrayna, Belarus, Gürcüstan və Moldova hələ də Sovet İttifaqının dağılması ilə bağlı baş verən planetar transformasiyanın fəsadlarından xilas ola bilməyiblər.
2 il bundan əvvələ qədər eyni vəziyyətdə olan, torpaqlarının 20 %-i işğal altında qalmış Azərbaycan xalqın iradəsi, Prezidentin illər ərzində apardığı düşünülmüş siyasəti və qətiyyəti nəticəsində bu fəsadları aradan qaldıra bildi. Dövlətimiz öz müstəqilliyini və öz ərazisi üzərində suveren hüquqlarını bərpa etdi. Digər keçmiş “müttəfiqlər” isə hələ də 30 il əvvəl elan etdikləri müstəqilliyin sevincini tam şəkildə yaşamağa nail olmayıblar. Ukrayna da onlardan biridir.
Baş verənlər bütün insanlığın taleyi üçün təəssüf hissi doğurur. Yaşadığımız dövrdə zaman sürətlə dəyişir. Orta əsrlərin quldarlıq münasibətləri artıq tarixi yaddaşlardan silinib, imperiyalar dövründə baş vermiş qanlı müharibələrin tarixə qovuşması və bir daha təkrar olunmaması üçün böyük ümidlər yaranıb. Bəşəriyyət XXI əsrə böyük elmi-texniki inqilab və Yer üzərində onun doğuracağı ideal həyat ümidi ilə qədəm qoyub. Məhz bu gün Yer üzərində yaşayan hər bir xalqın azadlıq və demokratiyaya qovuşması, bütün ölkələrin ahəngdar inkişafı və bütün insanların yüksək rifah şəraitində yaşaya biləcəyi mümkün və hətta labüd görünür. Dünyanın bütün bölgələrində belə sülhpərvər və insanpərvər ideyaların geniş yayıldığı və həyata keçdiyi bir zamanda demokratiyanın mənbəyi və təbliğatçısı sayılan Avropanın mərkəzində yeni müharibənin alovlanması çağdaş dövrün ən ağılsız və uğursuz layihəsi sayıla bilər. Bu tarixin təkərini geriyə çevirməyə cəhd göstərmək qədər absurd bir hadisədir.
XXI əsrdə – bəşəriyyətin yeni və daha sürətli inkişaf mərhələsinə qədəm qoyması ərəfəsində belə hadisələrin baş verməsi göstərir ki, dünyanın təhlükəsizliyi hələ də çox kövrəkdir. Bütün insanlığın xoşbəxt gələcəyi naminə bu kövrək təhlükəsizliyi qorumaq və möhkəmləndirmək dünya birliyinin hər bir üzvü üçün ilkin vəzifə olmalıdır. Bu gün Ukraynanın təhlükəsizliyinə bütün bəşəriyyətin təhlükəsizlik məsələsi kimi baxılmalıdır. Təəssüf ki, reallıq bizə başqa bir mənzərəni göstərir. Nəinki ayrı-ayrı fərdləri, hətta bütöv bir xalqı, böyük bir sivilizasiya vahidini öz iradəsinə tabe etdirmək istəyi, bütöv bir xalqın azadlıq arzusunu boğmaq cəhdləri hələ də beynəlxalq siyasi həyatın gündəliyində qalmaqdadır. Dünya birliyi bu cür cəhdlərin qarşısında inadla dayanmalı və bəşəriyyətin işıqlı gələcəyə gedən yolunda baş qaldıran belə maneələri qətiyyətlə dəf etməlidir.
Bu gün Ukrayna belə bir təhlükə ilə üz-üzədir. Lakin Ukrayna xalqının nümayiş etdirdiyi yenilməz mübarizə iradəsi ədalətin qələbə çalacağına böyük ümidlər yaradır. Bu ümidlərin doğrulması arzusu ilə Ukrayna xalqını dövlət müstəqilliyinin 30 illiyi münasibətilə təbrik edir və Ukrayna cəmiyyətinin hər bir üzvünə tezliklə öz təhlükəsizliyinə qovuşmağı, sülh, əmin-amanlıq və firavanlıq şəraitində yaşamağı arzulayıram.
Murad Türksoy
