29 oktyabr Türkiyədə Cümhuriyyət Bayramı kimi qeyd edilir. Bu tarixi gün türk millətinin sarsılmazlığının və iradəsinin nümunəsidir.
Bu münasibətlə başda Türkiyə prezidenti hörmətli Rəcəb Tayyib Ərdoğan olmaqla dövlət və hökumət üzvlərini, müxalifət partiyalarının liderlərini və millət vəkillərini, eyni zamanda bütün dünyada yaşayan türk qardaşlarımı səmimi qəlbdən təbrik edirəm!
29 oktyabr 1923-cü ildə rəsmən paytaxtı Ankara olan Türkiyə Cümhuriyyəti elan edildiyi gündən dünyada ədalətin bərqərar olmasına, dünya insanlarının hüquq bərabərliyinə nail olmaq üçün daima mübarizə aparmış, insanlığın dəyərini layiqincə qiymətləndirmişdir. Bu gündə dinindən, irqindən, millətindən asılı olmayaraq haqqı tapdalanan bütün insanların ümid məkanına çevrilmişdir.
Türkiyə ədalətin simvoludur!
Azərbaycan-Türkiyə əlaqələri daima tarixi dostluq, qarşılıqlı etimad, səmimi qardaşlıq münasibətləri əsasında qurulmuşdur. Xalqlarımızın eyni soykökünə, dilə, dinə, mədəniyyətə və bir çox digər qarşılıqlı bağlara malik olması bu iki ölkəni həmişə bir-birinə doğma edib, sevincli, kədərli günlərdə də biri digərinin yanında olub. Ulu öndər Heydər Əliyevin bir millət, iki dövlət olaraq xarakterizə etdiyi Azərbaycan-Türkiyə dövlətləri arasındakı münasibətlər yaşadığımız bu ağır günlərdə, dünyanın üstümüzə gəldiyi məqamlarda öz sözünü dedi.
Bu gün hər iki ölkənin rəhbərliyi tərəfindən həyata keçirilən düzgün, məqsədyönlü siyasət bütün sahələr üzrə keyfiyyətcə yeni müstəviyə keçmişdir. Qeyd etməlik ki, Türkiyə ilə Azərbaycan arasında əlaqələr çoxşaxəli və genişdir. Bu
İki qardaş ölkənin, bir-birinə verdiyi güclü dəstək nəticəsində Bakı-Tbilisi-Ceyhan, Bakı-Tbilisi-Ərzurum neft və qaz kəmərləri, Bakı-Tbilisi-Qars dəmir yolu xətti, TANAP və TAP kimi böyük iqtisadi layihələr reallaşaraq bu gün Avropanın enerji təhlükəsizliyində mühüm rol oynayır. İki qardaş dövlətin birliyi və müttəfiqliyi tarix boyu hər bir dövrdə öz xalqları ilə yanaşı diğər qonşu ölkələrin xalqlarına da rifah bəxş etmişdir.
Azərbaycan ilə Türkiyə arasında əlaqələrin ən yüksək səviyyədə olması və dünya düzənində əhəmiyyətli geosiyasi mövqedə olması bütün dünyaya bəllidir. Bu mövqeyə sevinən də var, düşmən kəsiləndə. Qürur dolu Vətən müharibəsi zamanı ilk günlərindən qardaş Türkiyə Azərbaycana siyasi-mənəvi dəstək verməsi, bu müharibədə Azərbaycanın tək olmadığını, Türkiyənin hər zaman dövlətimizin və xalqımızın yanında olduğunu bildirməsi təbii olaraq gücümüzə güc qatdı və əldə etdiyimiz möhtəşəm tarixi qələbədə mühüm rol oynadı.
Bizi sevməyənlərə ən böyük mesaj isə Şanlı Qələbənin şərəfinə dekabrın 10-da Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın iştirakı ilə Bakının ən böyük meydanı olan “Azadlıq meydanı”nda möhtəşəm Zəfər Paradı oldu. Dünyanın iki nəhəng şəxsiyyətinin çiyin-çiyinə dayanması ölkələrimizin birliyini, xalqlarımızın qardaşlığını bir daha bütün dünyaya nümayiş etdirdi və gələcək münasibətlərdə bu faktorun gücünü nəzərə almalarını subliminal olaraq diqtə etdi.
Tarixin sınağından çıxmış aşağıdakı fikirlər-Prezident İlham Əliyevin Avropa İttifaqının “Şərq tərəfdaşlığı” Proqramının sammitindəki çıxışı zamanı “Bu masa arxasında Türkiyə nümayəndələri yoxdur. Ancaq mən buradayam” deməsi, dünyanın əksər ölkələrinin planetimizin ən böyük ədalətsizliklərindən birinə – erməni işğalına reaksiya vermədiyi dövrlərdə Türkiyə Prezidenti Rəcəb Tayyib Ərdoğanın “Qarabağ Azərbaycan qədər bizim də məsələmizdir” bəyanatı, Azərbaycana rəsmi səfəri çərçivəsində Milli Məclisdə söylədiyi nitqində “…Bu gün də Azərbaycanın yanındayıq və bütün dünya bilsin ki, daim Azərbaycanın yanında olacağıq. Necə ki, Çanaqqalada azərbaycanlı gənclər Anadolu gəncləri ilə birlikdə şəhadətə yürüyüb qələbə qazanmışdılarsa, necə ki, #NuruPaşanın aslanları 1918-ci ildə Azərbaycanın köməyinə gəlmişdilərsə, biz də bu gün və gələcəkdə bərabər olacağıq…” söyləməsi həm iki Dahi Liderin, həm də iki qardaş xalqın sözü kimi qəbul edilməlidir.
İnanıram ki, analoqu olmayan bu münasibətlər yeni qurulan müasir dünyanın geopolitik mənzərəsinə öz müsbət təsirini verəcəkdir. Türkiyə nə qədər güclü olarsa, Azərbaycan da o qədər güclü olacaq.
Bir daha bayramımız mübarək!
Yaşasın güçlü Türkiyəmiz!
Yaşasın Azərbaycan-Türkiyə qardaşlığı!
Sadiq Qurbanov
Millət vəkili
