Hamı Təhsil Nazirliyinin müəllimlərin işə qəbul imthanlarının nəticələrindən yazır. Hamı Təhsil Nazirliyini ittiham edir. Haqlıdırlarmı? Həqiqəti yazmaq lazımdır. Müəllimlərin işə qəbul prosesi olduqca səffaf şəkildə keçirilir. Amma bundan sonrakı prosesdə Kərəmi ağlamaq tutur. Yüksək bal toplayan müəllimlər ucqar ərazidə yerləşən məktəblərə göndərilir. Bakı Şəhəri üzrə ən yüksək nəticə göstərən yaxın qohumumu 4 ilə yaxındır Təhsil Nazirliyi imtahan verdiyi məktəbə buraxmır.
Tanıdığım bir neçə jurnalist həmkarımızın həyat yoldaşları da imtahan verib, uğurlu nəticə qazansalar da onlar işə qəbul edilmir. Amma az bal toplayan şəxslər birdən -birə şəhərin ən məşhur məktəbində dərs deməyə başlayırlar. Əgər Təhsil Nazirliyi keçid balından aşağı bal toplayaraq məktəbdə işləyən müəllimlərin adını açıqlamamı istəsə onlara verə bilərəm.
Müəllimlərin yerdəyişməsi prosesində də bu rəzalət yaşanır. Dəyərli dostlarımızdan biri uzun illərdir repititor fəaliyyəti ilə məşğuldur. Müəllimlərin işə qəbul imtahanlarından yüksək bal toplasa da məktəbdə ona iş vermədilər. Deməli yüksək bal toplayan dostumuz məktəbə gedəndə məlum oldu ki, onunla bərabər həmin ixtisasdan dərs deməyə daha iki müəllim göndərilib. Dostumuz 2 il mübarizə aparsa da heç nəyə nail ola bilmədi. Çünki gələn iki müəllimə həmin məktəbə imtahanla deyil, kimisə görüb gəlmişdi. İndi bu amillər təhsilimizin daha da uçuruma yuvarlanmasına səbəb olur. Biz Təhsilimizin daha yüksək səviyyədə olmasını arzu edirik. Təhsildə rüşvət, gələcəyə çalınan baltadır….
Qoşqar Salmanlı
