Keçən hər gün tarixə dönür. Amma tarixə yazılan günlərin hamısı yaddaqalan olmur. Elə günlər var ki, unudulub gedir, elələri də var ki, onlar heç vaxt unudulmur. Xalq olaraq keçdiyimiz Vətən müharibəsi. Belə günləri unudulmaz edən qəhrəman şəhidlərdir!
Torpaq uğrunda tarix yazan mərd oğullardan biri – Mahir Qərib oğlu Dadaşzadənin bu gün doğum günüdür.
Mahir Dadaşzadə 1993-cü il sentyabrın 1-də Beyləqan rayonunun Allahyarlı kəndində anadan olub. Beyləqan şəhər 4 saylı orta məktəbin birinci sinfinə daxil olub, 2007-ci ildə isə həmin məktəbin səkkizinci sinfini bitirib. Elə həmin il sənədlərini C. Naxçıvanski adına hərbi məktəbə təqdim edərək ora daxil olub. C. Naxçıvanski adına hərbi məktəbi 2010-cu ildə müvəffəqiyyətlə bitirəndən sonra Heydər Əliyev adına Hərbi Ali Məktəbə daxil olub. M. Dadaşzadə 2014-cü ildə Hərbi Ali Məktəbi bitirib və leytenant rütbəsi alıb. 2014-2015-ci ildə isə Müdafiə Nazirliyi nəzdində təlim mərkəzində təhsil alıb, taqım komandiri rütbəsinə yiyələnib. O, 2015-ci ildə “N” saylı hərbi hissənin taqım komandiri vəzifəsinə təyin edilib. Nümunəvi xidmətə görə, komandanlığın Fəxri Fərmanı və təşəkkürünü alıb. 2016-cı ilin Aprel döyüşlərində göstərdiyi igidliyə görə isə, baş leytenant rütbəsi və təşəkkürnamə alıb. Daha sonra, 2018-ci ildə Azərbaycan Ordusunun yaranmasının 100 illiyi medal ilə təltif olunub.
Bütün bu titulların sahibi, xalqımızın qəhrəman oğlu Mahir Dadaşzadənin Vətən torpaqlarının azad olunması uğrunda gedən döyüşlərdə amansız düşmənin məhv olması üçün göstərdiyi igidlik, şücaət və zabit ləyaqəti dövlətimizə və millətimizə sədaqətin bariz nümunəsidir! …
Mahir Dadaşzadə 28 oktyabr 2020-ci ildə düşmənlə apardığı qanlı döyüşdə şəhidlik məqamına yüksəlib.
Şuşaya qədər döyüşəcəyini deyən Mahirin arzusu yarıda qırılır. Amma döyüş yoldaşları, əsgərləri bu cəsur komandirin arzusunu reallaşdırır. Şuşa azad edilir. Cəmi 27 yaşında şəhadətə yüksələn Mahiri dövlət başçısı bir çox orden və medallarla təltif edib.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarına əsasən Mahir Dadaşzadə ölümündən sonra “Vətən uğrunda”, “Döyüşdə fərqlənməyə görə”, “Füzulinin azad olunmasına görə” və “3-cü dərəcəli “Rəşadət” ordeni” medallarıyla təltif edilib. Ruhun şad olsun şəhidim!
Qoşqar Salmanlı
