Bakıda əhaliyə verilən su ilə bağlı problemlər hələ də öz həllini tapmır. Mətbuatda və sosial şəbəkələrdə “Azərsu” Açıq Səhmdar Cəmiyyətinin ünvanına səsləndirilən tənqidi yazılar və videogörüntülər demək olar ki, hər kəs üçün yad məlumat deyil. Bu günlərdə redaksiyamıza daxil olan müraciətlərdən biri də Suraxanı rayonu, Hövsan qəsəbəsinin sakinlərinin narazılığı ilə bağlı olub.
Alp.az-ın məlumatına görə, Bakı şəh, Suraxanı rayonu, Hövsan qəsəbəsi, 1379 saylı bağ evinin sakini Vüqar Quliyev tərəfindən daxil olan müraciətdə adıçəkilən ünvan ərazisində illərdir su probleminin mövcudluğu öz əksini tapıb.
Şikayətdə bildirib ki, həmin ünvanın da yerləşdiyi ərazidə – küçədə son bir neçə il ərzində yay vaxtı su təchizatı ilə bağlı ciddi problemlər yaranır:
“Ötən bir neçə il qlobal istiləşmə, sonra müharibə və su pulunun aşağı olmasını müvəqqəti çətinlik kimi qəbul etdik. Yəni dövlət qurumuna – Azərsu-nun yerli qurumuna inanın, gözləmişik. Hər il problemin həll olunacağını deyirlər. Lakin su təhcizatı ilə bağlı müsbət nəticə yoxdur. Çox çətinliklərlə üzləşirik. Biz hətta suyun qrafiklə verilməsinə də razıyıq”.
Şikayətçilərin sözlərinə görə, Azərsu-nun Suraxani şöbəsi problemdən məlumatlıdır və hər il su təchizatı ilə bağlı narahatlığı aradan qaldıracaqlarını bildirirlər. Əgər belə davam edəcəksə, problemlə bağlı dövlət başçısına müraciət etmək məcburiyyətində qalacaqlar.
“Azərsu” Açıq Səhmdar Cəmiyyətinin mövqeyini dərc etməyə hazırıq.
