39 il komada qalan keçmiş futbolçu Jan-Pyer Adams öldü. İndi bütün dünya Jan-Pyer Adamsla həyat yoldaşı Bernadettin sevgi hekayəsindən danışır. Əslində bu sevgi dastanı bir sadiqlik, inam, güvənc dastanıdır. Jan-Pyer Adams kimdir. Alp.az bir zamanların məşhur futbolçusunun acı həyat hekəsini təqdim edir.
Jan-Pyer Adams 1948-ci ildə hələ Fransanın müstəmləkəsi olan Seneqalın Dakar şəhərində anadan olub. Kiçik yaşlarında ata-anasını itirən bu balaca oğlan nənəsinin himayəsində yaşayıb. 10 yaşında nənəsi ilə Fransaya gəlib və burada bir fransız ailə tərəfindən övladlığa götürülüb. Futbolla məşğul olmağa başlayan Jan-Pyer “Nim”, “Nitsa”, PSJ klublarında çıxış edib, mərkəz müdafiəçisi mövqeində oynayıb. Bu istedadlı gəncin adı bir çox Avropa klubları ilə hallansa da Jan-Pyer Adams ona doğma olan Fransanı tərk etməyib. Elə burada da öz sevgisini tapıb. Onun Bernadett eşq hekayəsi hələ o zamanlar Fransa mətbuatının bəzəyinə çevrilmişdi. Məhz Bernadettin inamı onu yaşadırdı. Jan-Pyer 1972-1976-cı illərdə Fransa millisində 22 oyun keçirir. Lakin zədələr bu məşhur futbolçun karyerasını tez bitirməyə vadar edir.
O, artıq futbolçu karyerasını bitirdikdən sonra dizində əməliyyat olunur və bu zaman anestezioloqun səhvi ucbatından bronxospazm keçirir, oksigensiz qalan beyni zədələnir və komaya düşür. Çoxları ondan üz döndərsə də, ona dəli kimi aşiq olan Bernadett onu tək qoymur.
Arvadı Bernadettin evtanaziya təklifini qəbul etməməsinə görə 39 il idi ki, komada yaşayırdı. Deyilənə görə, arvadı hər gün onunla söhbət edirmiş.
Komada olduğu müddətdə ara-sıra gözlərini açıb, lakin heç vaxt komadan tam ayılmır.
Jan-Pyer Adams dünən 73 yaşında vəfat etdi. “Nitsa” və PSJ klublarının növbəti oyun öncəsi Adamsın xatirəsini yad edəcəkləri gözlənilir.
Qoşqar Salmanlı
