Ermənistan atəşkəsi pozmaqda davam edir, artıq aramsız davam edən erməni atəşləri “Qətiyyətli cavab” əməliyyatı ilə susduruldu. Ermənistan tərəfi isə yaratdığı bu qarşıdurmadan böyük xəbərlər düzəldərək, yenə də özlərini yazıq kimi təqdim edib beynəlxalq ictimaiyyəti üzərimizə qaldırmağa çalışırlar. Bu istiqamətdə hafta.az-a müsahibə verən Xocalının, Şuşanın deputatı Elman Məmmədov çox ciddi və həllini gözləyən təxirəsalınmaz məqamlara diqqət çəkib.
– Elman müəllim, erməni separatçıları atəşkəsi intensiv şəkildə pozmaqda davam edir, üstəlik, Rusiya sülhməramlılarının nəzarətində olan Xocalının Naxçıvanlı kəndindən Xankəndiyə yol çəkirlər…
– Dediyiniz Naxçıvanlı kəndindən Xankəndinə yol var. Naxçıvanlı kəndindən asfalt yol Əsgəran qəsəbəsinə gəlir, oradan da Xankəndinə gedir. Əgər onlar ikinci yol çəkirlərsə, o zaman bu yol Naxçıvanlı kəndindən, Kəklik dağının üstündən Harop kəndindən keçib Xankəndinə birləşəcək. Ancaq o dağ yoludur, çox çətin yoldur. Həmin yol bir növ araba yolu kimidir. İndi yəqin ki, o yolu təmir edib hərbi məqsədlər üçün istifadə edəcəklər.
Siz deyirsiniz ki, bu yol sülhməramlıların gözü qarşısında çəkilir. Əvvəla, bunlar sülhməramlı deyil. Onlar Rusiya dövlətinə məxsus hərbi kontingentdir. Heç kim bunlara “sühməramlı” mandatı verməyib, bunlar öz-özlərinə “sülhməramlı” deyirlər. Azərbaycan ərazilərinə gəldikləri gündən də erməniməramlılıqla məşğuldurlar. Rusiya hərbi kontingenti ermənilərə hər şəraiti yaradır. Onlar erməniləri maliyyələşdirir, yanacaq verirlər. Bəs Rusiyadakı cinayətkar erməni Xankəndidə necə oturub? Onu ruslar özləri ora gətiriblər, müdafiə edirlər, qoruyurlar. Təlxək Paşinyan Vladivastoka gedib-gələndən sonra sərhəddə atəşkəsin pozulması daha da intensivləşdi, oyunlar təzədən başlandı.
– Ermənilərin başlatmaq istədikləri üçüncü savaş onlara nə verə bilər?
– İndi də bütün dünyaya səs salıblar ki, Azərbaycan Ermənistana hücum edib, mülki əhaliyə atəş açıb. Bu, növbəti erməni məkiri, erməni təxribatı, erməni şəridir. Ermənilər mütəmadi olaraq mövqelərimizi atəşə tuturlar, ərazilərimizi minalayır, qeyri-qanuni səfərlər təşkil etməklə digər qanunazidd əməllərini davam edirlər. Azərbaycan sərhədlərini pozurlar. Yeni tikilən yoldan düşmənin nə qədər canlı hərbi birləşməsi, separatçılar, cinayətkarlar var ki, hamısı da Rusiya hərbi kontingentinin nəzarət etdiyi ərazilərdən ərazilərimizə daxil olurlar. Yəni regionda bütün problemi yaradan ermənilərdir. Bunun günahını Azərbaycanın üzərinə yıxmaq istəyirlər. Beynəlxalq aləmdə belə fikir yaratmaq istəyirlər ki, guya Azərbaycan Ermənistan ərazisinə müdaxilə edir.
Ermənilər bununla “bəlkə də qaytardılar” xülyalarını nümayiş etdirir, bu cür xəstə xəyallarla yaşayırlar. Ən böyük günahkar isə erməniləri bu xəstə düşüncələrə sövq edənlərdir, bunlara yalançı vəd verənlərdir. Ermənilər tarixin heç bir dövründə müstəqil hərəkət edib, siyasət yürütməyiblər. Həmişə xaricdən gələn pullarla, xaricdən verilən tapşırıqlarla idarə olunublar. Bu gün də o cür davam edirlər.
Ermənilər bir tərəfdən də Rusiya tərəfindən idarə olunur. Rusiya yaxşı düşünsə bir qədər ehtiyatlı olar. Qərb erməniləri Cənubi Qafqazda ikinci Ukrayna yaratmağa hazırlayır. Rusiya bunu götür-qoy edib ermənilərin bu təxribatlarının qarşısını almaq üçün çalışmalıdır. Rusiya Ukraynadakı aqibətini gözünün qabağına gətirməlidir. Hansı ki, bunu Qərb Rusiya üçün hazırladı. İndi də Qərb hər tərəfə oynamağı bacaran, çox mahir oyunçu olan ermənilərdən istifadə edib yenidən aranı qarışdırmaq istəyir. Təlxək ermənilər də bu fitvalara, bu vədlərə inanıb düşüb ortalığa. Bunlar fikirləşməlidir, 44 günlük müharibənin dərslərindən nəticə çıxarmağı bacarmalıdırlar. O müharibədən sonra keçən bu iki ilə yaxın müddətdə Azərbaycan Ordusunun vaxtaşırı keçirdiyi antiterror əməliyyatlarının nəticələrindən dərs almalıdırlar. Əminəm ki, ermənilər bu yoldan əl çəkməsələr, Ermənistan adlı dövlətin mövcudluğu sual altında qala bilər. Azərbaycan öz ərazilərini və öz əhalisini qorumaq üçün lazımi tədbirlər görməyə qadirdir, görür və görəcəkdir. Ermənilərin sərhəddə diversiya hərəkətləri Azərbaycanı öz sərhədlərinin təhlükəsizliyini təmin etmək üçün bir az da irəliyə gedərək bir bufer zonası yaratmağa məcbur edəcək. Ermənistan Azərbaycanı buna məcbur edəcək. Onlar bizi məcbur edəcəklər ki, yeni çəkilib ermənilərin nəzarətinə verdiyimiz yolda Rusiya hərbi kontingentinə etibar etməsin və öz qoşunlarını o ərazilərdə yerləşdirsin. Ermənilər nəticə çıxarmasalar, onların varlığı sual altına düşəcək. Ermənilər fikirləşə bilmirlər. Cənab Prezidentin dediyi kimi, Dəmir Yumruq həmişə bunların başlarının üstündə olmalıdır. Bunlara güc nümayiş etdirməlisən. Bunlar güc görəndə sülhə gəlib yerlərində otururlar. Yəni ermənilərdən Dəmir Yumruğu əksik eləmək lazım deyil. Onlar normal insan kimi başa düşmürlər.
– Son Brüssel danışıqlarında erməni baş nazir sülh gündəliyindən bəhs etdi. Ermənistana qayıdan kimi isə əks-bəyanatlarla çıxış etdi, yenə “status”, yenə “ATƏT-in Minsk qrupu”, yenə ermənilərin təhlükəsizlik məsələsindən danışdılar…
– Regionda gedən oyunun əsas ideyası, məqsədi bəllidir. Bu gün Cənubi Qafqaz uğrunda Rusiya ilə Qərb arasında qanlı bir savaş gedir. Qərb Rusiyanı Cənubi Qafqazdan çıxarmaq üçün çalışır. Rusiya da Qərbi Cənubi Qafqaza buraxmamaq üçün çalışır. Onlar üçün maşa Ermənistandır. Rusiya və Qərb hər biri öz maraqları baxımından bu maşadan istifadə edib münaqişənin qarşısını alırlar. Buna görə də təhlükə bir dəqiqə də sovuşmur. Bu maraqlar Cənubi Qafqazada toqquşur. Ermənilər də tarixən belə düşünürlər ki, mahir oyunçulardır və hər iki tərəflə oynamağı, bəhrələnməyi bacarırlar. Fikirləşmirlər ki, elə tarix boyu daş buna görə başlarına düşüb. Burda nə Qərb, nə də Rusiya ermənilərlə “əmioğlu” deyil. Erməniləri köçürüb bizim tarixi torpaqlarda ona görə dövlət qurublar ki, daim bizə qarşı alət kimi istifadə etsinlər.
– Brüsseldə Şarl Mişelin vasitəçiliyi ilə sanki əldə olunmuş müəyyən razılaşmalar Avropa İttifaqının mövqeyini zəiflətməyə yönələ bilərmi?
– Əlbəttə ki, məqsəd həm də budur. Bu gün beynəlxalq aləmdə baş verən hadisələrə baxın: Ukraynada gedən müharibənin dünyada yaratdığı duruma nəzər salın. Ukraynada Avropa və Qərb Rusiyaya qarşı dayanb, ümumilikdə bu deyilməsə də, Ukraynada faktiki 3-cü dünya müharibəsi gedir. Qərblə Amerika bir tərəfdən, Rusiya digər tərəfdən. Belə olduğu təqdirdə, bu üç dövlət ermənilərin, elə özlərinin də iddia etdiyi kimi, bir təşkilatda birləşib nəyisə həll edə bilərlər. Bu üç dövlət 30 il müddətində torpaqlarımızn işğaldan azad olunması ilə bağlı nəsə bir iş gördülər, yox! Yalnız başımızın altına “sülh danışıqları” yastığını qoymaqla məşğul idilər. Bu gün bəyan edirik ki, Azərbaycan öz məsələsini həll edib və daxili işlərimizə qarışmayın, gedin işinizlə məşğul olun. Cənab Prezident dəfələrlə deyib ki, biz öz məsələmizi özümüz həll eləmişik, indi nə istəyirsiz, siz bu təlxək dövləti, milləti qızışdırıb niyə ortaya atırsınız?! Axı onlar ağıllanmasalar, sizin dediklərinizlə, sizin fitvanızla oturub-dursalar Ermənistan dövlətinin sonu gələcək. Ermənistan Azərbaycanın tarixi ərazilərində qurulub. Bizi məcbur edəcəklər ki, öz tarixi torpaqlarımızı geri alaq.
– Türkiyədə ekspertlər belə təhlillər verirlər ki, Azərbaycanla sərhəddə atəşkəsi pozmaqla Türkiyəni də oyuna qatmaq istəyirlər…
– Bu gün maraqlı güclər Yunanıstanı da silahlandırıb Türkiyəyə qarşı qoymaq istəyirlər. Neçə illərdir Türkiyə Rusiyadan “S-400” qırıcılarını almaq üçün Qərb, ABŞ Türkiyəyə düşmən kəsilib. Eləcə də həmin Qərb Türkiyə ilə Rusiyanın yaxınlaşan münasibətlərindən ehtiyat edərək Ermənistanı qızışdırıb ortaya salır ki, müharibə alovlansın və bu da Türkiyə ilə Rusiya arasında qarşıdurmaya səbəb olsun. Ona görə də bu böyük oyunlardan uğurla çıxmaq üçün daha çox ermənilər diqqətli olmalıdır. Ermənilər fikirləşməlidirlər ki, onlar 100 il qabaqkı – 1915-ci ildəki həyatı yenidən yaşaya bilərlər.
– Azərbaycan daxilində sülhməramlıların xeyrimizə olmayan təxribatçı davranışlarını müşahidə etməkdəyik. Azərbaycan Ordusu sərhəddə erməni diversantlarına, hərbçilərinə “Qətiyyətli cavab” verdi. Daha hansı qətiyyətli addımlar atılmalıdır ki, Xocalı, Xankəndi və digər ərazilər nəzarətə götürülsün?
– Rusiya sülhməramlılarının Qarabağda yerləşməsi ilk gündən bizim üçün bir təhlükə mənbəyi olub. Ermənilər bu məqamdan da özləri üçün istifadə etmək məqsədi güdə bilər. Belə ki, separatçılar təxribatlar törətməklə Azərbaycan Ordusunu antiterror əməliyyatı keçirməyə məcbur edirlər. Bu əməliyyatlar zamanı ermənilər, elə sülhməramlıların özləri qəsdən Rusiya hərbi kontingentinə zərər yetirə bilər. Ermənilər bununla Rusiya-Azərbaycan arasında münasibətləri pozmağa çalışa bilər. Heç şübhəsiz, bu da təxribat proqramına daxildir.
Düşünürəm ki, cənab Prezident bütün bunların hesablayıb diqqətli və qətiyyətli addımları ilə prosesin yumşaq həllinə çalışacaq. Bütün hallarda Dəmir Yumruq da yerindədir. Ümidvaram, proseslər addım-addım Azərbaycanın məqsəd və maraqlarına doğru irəliləyəcək. Bu gün də Ordumuzun “Qətiyyətli cavab”ı əbəs yerə verilmədi. Ermənilər bundan dərs almalıdır…
