Sentyabrın 27-də anım günü ilə əlaqədar Yasamal rayon ictimaiyyəti Vətən müharibəsində ölkəmizin ərazi bütövlüyü uğrunda canlarını fəda etmiş əsgər və zabitlərimizi yad edib. Alp.az xəbər verir ki, öncə ictimaiyyət nümayəndələri Anım Günü çərçivəsində Yasamal rayonunda agacəkmə aksiyası keçiriblər. Rayon rəhbərliyi və şəhid ailələrinin iştirak etdiyi ağacəkmə aksiyasında müxtəlif növ ağaclar əkilib.
Bu aksiyada iştirak edən millət vəkilləri Ülvi Quliyev və Elnur Allahverdiyev şəhidlərimizin xatirəsinə ağac əkiblər.
Daha sonra şəhidlərin əziz xatirəsinə ehtiram əlaməti olaraq 2-ci Fəxri Xiyabanda şəhidlərimizin məzarları ziyarət edilib. Saat 12.00-da ümumölkə aksiyası çərçivəsində şəhidlərimizin xatirəsi bir dəqiqəlik sükutla yad edildi.Daha sonra Yasamal rayonu ictimaiyyətinin nümayəndələri Təzə Pir məscidində ehsan mərasimində bir araya gəliblər.Tədbirdə şəhidlərin ruhuna dualar oxunub, onların əziz xatirəsi ehtiramla yad edilib.
