Prezident səlahiyyətlərini Alen Simonyan icra edəcək
Bir həftə əvvəl istefa verən Ermənistan Prezident Armen Sarkisyan son 24 saat ərzində istefasını geri götürmədiyi üçün onun səlahiyyətlərinə xitam verilib.
Alp.az xəbər verir ki, “News.am” saytına danışan Ermənistan Parlamentinin mətbuat katibi Tsovinar Xaçatryan bildirib ki, Milli Assambleyaya hələlik Prezident A.Sarkisyandan istefasını geri götürmək haqqında müraciət daxil olmayıb.
“Bu gün Prezidentin səlahiyyətləri dayandırılacaq. Dövlət başçısının səlahiyyətlərini müvəqqəti olaraq Milli Assambleyanın spikeri Alen Simonyan icra edəcək. Simonyanı isə vitse-spikeri Akop Arşakyan əvəz edəcək”, – deyə Xaçatryan vurğulayıb.
Xatırladaq ki, A.Sarkisyan ötən bazar günü istefa verib. Sarkisyan istefasına səbəb kimi Prezidentin ölkə və xalq üçün indiki çətin dövrdə daxili və xarici siyasətdəki radikal proseslərə təsir etmək üçün lazımi alətlərə malik olmadığını göstərib.
Qeyd edək ki, Sarkisyan 2018-ci ildən etibarən Ermənistan Prezidenti vəzifəsində idi.ayna.az
