Rusiya Silahlı Qüvvələrinə məxsus “Pantsir-S1” zenit raket-top kompleksi (ZRTK) Ukraynanın cənubunda palçıqlı sahədə ilişib qalıb.
Alp.az Ukrayna mediasına istinadən xəbər verir ki, “Pantsir-S1” ZRTK Ukraynanın cənubundakı Xerson şəhəri yaxınlığında palçığa ilişib dayanıb.
Bildirilib ki, “Pantsir-S1” ZRTK Xersona doğru hərəkət edən Rusiya Silahlı Qüvvələrinin hərbi konvoyunun tərkibində olub. “Pantsir-S1” Ukrayna ordusunun “Bayraktar TB2” PUA ilə hava hücumu nəticəsində zərərsizləşdirilib.
Qeyd edək ki, Ukraynaya hücum əməliyyatı zamanı Rusiya hərbi maşınları palçıqlı ərazilərə görə, əsasən yollarla hərəkət edir və bunun üçün də tez-tez pusquların və hava hücumlarının qurbanı olur.
Xatırladaq ki, Rusiyanın “Pantsir-S1” zenit raket-top kompleksinə qənim kəsilən “Bayraktar TB2” PUA-ları ilə Türkiyə Silahlı Qüvvələrinin Suriyanın İdlib vilayətində həyata keçirdiyi “Bahar qalxanı” əməliyyatı zamanı bir neçə “Pantsir-S1” zenit raket-top kompleksi vurulmuşdu.
2020-ci ilin sentyabr ayının 27-də başlayan və Azərbaycan Ordusunun qələbəsi ilə başa çatan İkinci Qarabağ Müharibəsində də bir neçə silah sisteminin uğurlu tətbiqi hərbi əməliyyatların taleyinin qısa müddətdə həllinə imkan verdi. Bu yeni silah sistemlərindən ən effektivi Türkiyənin “Baykar Savunma” şirkətinin istehsalı olan “Bayraktar TB2” silahlı pilotsuz uçuş aparatı (SPUA) oldu.
“Poliqon”
