Görünür, dünən -oktyabrın 8-də Krım körpüsündəki partlayışdan sonra düşdüyü şok vəziyyətindən hələ çıxmayıblar…
10 noyabr 2020-ci il tarixli üçtərəfli bəyanatın imzalanmasından ötən iki ilə yaxın müddətdə Azərbaycan Respublikasının Qarabağ və Şərqi Zəngəzur iqtisadi rayonlarının bir hissəsində müvəqqəti olaraq yerləşmiş Rusiya “sülhməramlı” kontingentinin məsuliyyət zonalarına dair gündəlik xəritələrdə yol verdiyi xəta və səhvlərin səbəbləri barədə yekdil bir nəticəyə gəlmək olmur. Anlamaq olmur, həmin hoqqalar bilərəkdən, Azərbaycana qarşı təzyiq, təxribat məqsədi ilə edilir, yoxsa bunlar həmin kontingentin və ya Rusiya Müdafiə Nazirliyinin bəhs ediılən xəritələrin tərtibi ilə məşğul olan əməkdaşlarının səhlənkarlığından, bəlkə də iş başında əyyaşlıq etmələrindən irəli gəlir. Ancaq bu dəfə məntiqsizlik bütün əndazələri aşıb…
Moderator.az-ın son araşdırmasından bəlli olur ki, Rusiya MN-in rəsmi saytının “sülhməramlı”lara aid bölməsində tərtib edilən 8 oktyabr 2022-ci il tarixinə dair xəritədə əvvəla, Füzuli rayonunun Yuxarı Veysəlli kəndi düz ayrılma xəttinin üzərində yerləşdirilməklə, demək olar ki, “sülhməramlı”ların məsuliyyət zonasına daxil edilib. Halbuki, Azərbaycan Müdafiə Nazirliyinin həmin tarixdə Ali Baş Komandan İlham Əliyevin “Tvitter” səhifəsinə istinadla yaydığı rəsmi məlumatına görə(bax: //mod.gov.az/az/news/prezident-ilham-eliyev-muzeffer-azerbaycan-ordusu-daha-16-kendi-isgaldan-azad-edib-33705.html), 7 noyabr 2020-ci il tarixdə Yuxarı Veysəlli kəndi işğalçı ermənilərdən azad edilib. Səhv etmiriksə, ilk dəfədri ki, həmin məntəqə Rusiya MN-in xəritəsinə daxil edilir… İkinci nəzərə çarpan daha məntiqsiz bir haldır. Belə ki, xəritədə keçmiş Laçın “dəhlizi” ərazisində artıq rəsmən Azərbaycan Respublikasının nəzarətinə qaytarılmış Laçın şəhəri və Zabuxdan da keçməklə patrul xidməti göstərilməsi bir yana, Zabux kəndinin yerində Ağanus kəndi göstərilib…
Zəruri arayış:
Nəzərinizə çatdıraq ki, Füzuli rayonunun Divanalılar kəndi kimi Yuxarı Veysəlli kəndi də Xocavənd rayonunun ərazisi içərisində bir “anklav” kimi yerləşib. Divanalılar rəsmən azad olunsa da, demək olar ki, ona bitişik olan Xocavənd rayonunun Cütçü kəndi Rusiya hərbi kontingentinin və separatçıların nəzarətində qalıb. Eləcə də rəsmən azad olunmuş Yuxarı Veysəllinin yaxınlığındakı Güneyxırman və Quzeyxırman kəndləri, həmçinin Üryandağ yüksəkliyi(580 m) Rusiya hərbçilərinin nəzarətindədir…
P.S. Görünür, Rusiya MN dünən Krım körpüsündəki partlayışdan sonra düşdüyü şok vəziyyətindən hələ çıxmayıb… Amma bütün hallarda, müvafiq qurumlar, ixəritə üzərində olsa da, Azərbaycanın suveren əraziləri ilə bağlı bilərəkdən və ya səhvən edilən manipulyasiyalar barədə Rusiya tərəfdən izahat tələb etməlidir…
Sultan Laçın
