Milli Məclisin Mədəniyyət Komitəsinin sədri Qənirə Paşayeva əməkdar jurnalisti, tanınmış yazıçı-publisist Varis Yolçiyevi 55 illik yubileyi münasibəti ilə təbrik edib.
Alp.az xəbər verir ki, millət vəkili V.Yolçuyevin istər ədəbi, istərsə də ictimai fəaliyyətdə hər zaman fərqləndiyini diqqətə çatdırıb.
“Təsadüfi deyil ki, siz Azərbaycan Yazıçılar Birliyinin üzvü olmaqla yanaşı, Beynəlxalq Yazıçılar Gildiyasının, Dünya Gənc Türk Yazarlar Birliyi Məsləhət Şurasının, Rusiya Yazıçılar İttifaqının da üzvüsüz. 1991-ci ildə “168 saat” qəzetinin baş redaktoru, 1993-cü ildə “7 gün” qəzetinin redaktoru olmusuz. 1995-ci ildə AzTV-nin “Gecə kanalı” proqramının yaradıcılarından olmusuz.
2004-cü ildə “Azərbaycan” nəşriyyatına baş redaktor təyin edilmisiz. 2007-ci ildə “Azərbaycan Televiziya və Radio Verilişləri” QSC-də Dövri Nəşrlər və Sosioloji Araşdırmalar Departamentinin direktoru vəzifəsinə gətirilmisiz. Siz, həmçinin Azərbaycanda ilk milli teleradio jurnalı “TV plyus”un baş redaktorusuz”, – millət vəkili bildirib.
18 kitabın redaktoru olan V.Yolçuyevin yaradıcılığına toxunan millət vəkili bildirib ki, “Sonuncu ölən ümidlərdir”, “Bir ovuc torpaq”, “Sənə inanıram”, “Yetmiş yeddinci gün”, “Əzilmiş fotoşəkillər”, “Metamorfoz”, “Yol ayrıcında azıb qalanlar”, “Son məktub”, “Yaşıl üzlü gündəlik”, “Bitməyən matç”, “Üçbucaq”, “Uzaqdan gələn yağış” və b. kitabları ona oxucu məhəbbəti qazandırıb.
“Qızıl Kəlmə” ədəbiyyat mükafatı, III LiFFT festivallar festivalının qızıl medalı, UNESKO-nun “Adam Mitskeviç” medalı, Rusiya Yazıçılar İttifaqının “Mayakovski”, “Puşkin” medalları ilə təltif edilən yubilyarı Qənirə Paşayeva bir daha təbrik edib, yaradıcılıq uğurları arzulayıb.
Q.Paşayeva yubilyara Komitə adından təbrik məktubu və xatirə hədiyyəsi təqdim edib.
