image-bookfair_2000x150_gif_az_local
image-fb_img_1662570783975backend

Qənirə Paşayeva tanınmış şairi təbrik etdi

image-ads_728x90

Milli Məclisin Mədəniyyət Komitəsinin sədri Q.Paşayeva qocaman şair-tərcüməçi Agasəfa Yəhyayevi 80 illik yubileyi münasibəti ilə təbrik edib.

Milli Məclisin Mədəniyyət Komitəsinin sədri Qənirə Paşayeva Azərbaycan Yazıçılar Birliyinin və Azərbaycan Jurnalistlər Biliyinin üzvü, tanınmış şair-tərcüməçi Agasəfa Yəhyayevlə görüşüb, onu 80 illik yubileyi münasibəti ilə təbrik edib, ürək sözlərini bölüşərək, Komitə adından Təbrik məktubu təqdim edib.
Təbrik məktubunda yazılır:
“Hörmətli Ağasəfa müəllim,
Sizi 80 illik yubileyiniz münasibəti ilə ürəkdən təbrik edir, möhkəm can sağlığı diləyir, ən xoş arzularımı yetirirəm!
Siz Azərbaycan mədəniyyətinə ünlü simalar bəxş etmiş, özünəməxsus ədəbi ənənələri olan Xızı torpağında doğulmusuz. Bakı şəhərində orta məktəbi bitirdikdən sonra Moskvada M.Qorki adına Ədəbiyyat İnstitutunda təhsil almısız. “Kirpi” satirik jurnalı və “Azərbaycan qadını” jurnalı redaksiyalarının əməkdaşı (1965-1978), “Yazıçı” nəşriyyatında Bədii tərcümə redaksiyasının böyük redaktoru (1978-1989), “Karvan” kitablar seriyası redaksiyasında böyük redaktor (1989-1990), “Novruz” qəzetində məsul katib (1990), habelə “Ədəbiyyat qəzeti”ndə məsul vəzifədə (1991-1993) çalışmısız. Doxsanıncı illərdə, doğma Qarabulaq kənd orta məktəbində müəllimlik etmisiz.

Mətbuatda ilk şeiriniz (“Sazım”) 1957-ci ildə Sumqayıt şəhər qəzetində yayınlanıb. O vaxtdan dövri mətbuatda ardıcıl çıxış edirsiz. Şeirlərinizlə yanaşı, bədii tərcümələriniz də oxucuların rəğbətinə səbəb olub.

L.N.Tolstoyun mənzum nağıllarını, N.Qribaçov, Q.Qulam, R.Babacan, İ.Selvinski, S.Vasilyev, B.Oleynik, A.Lupan, Q.Quliyev, M.Qanoat, Ş.Petefi və b. görkəmli sənətkarların əsərlərindən örnəkləri uğurla tərcümə etmisiz.

“Yolçu yolda gərək” (“Azərnəşr”, 1966), “Yaşat məni” (“Gənclik”, 1970), “Ürəyimdir oxuyan” (“Gənclik”, 1976), “Ürəyimə yatanlar” (“Yazıçı”, 1979), “Fikir dünyası” (“Yazıçı”, 1981), “Bağçada birinci gün” (“Gənclik”, 1983), “Günəşin dalınca gedən oğullar” (“Yazıçı”, 1984), “Odla oynayıram” (“Yazıçı”, 1987) və b. kitablarınız oxucularınız tərəfindən məhəbbətlə qarşılanıb.

“Ölkəm” (1980), “Azərbaycan” (1981), “Əsrin yolu” (1984) kitablarını da siz tərtib etmisiz.
Sizi bir daha, 80 illik yubileyiniz münasibəti ilə Milli Məclisin Mədəniyyət komitəsi adından təbrik edir, ən xoş arzularımızı yetirirəm”!

Q.Paşayeva ustad ədibə xatirə hədiyyələri bağışlayıb.

Şair Komitə sədrinə səmimi görüş və təbrik üçün təşəkkür edib.
Görüşdə “NƏFƏS” İB Firəngiz Balakişiyeva iştirak edib.

image-ads_728x90

  • whatsapp
  • messenger
  • telegram
  • vkontakte
  • odnoklassniki