Milli Məclisin Mədəniyyət Komitəsinin sədri Qənirə Paşayeva Amerika-Azərbaycan Cəmiyyətinin rəhbəri Tomris xanım Azəri ilə görüşüb.
Komitə sədri Tomris xanımın Amerika-Azərbaycan Cəmiyyətinin rəhbəri, Azərbaycan Xalq Cümhuriyyətinin qurucularından Nağı Şeyxzamanlının nəvəsi olaraq hər zaman xalqımızı, mədəni irsimizi, haqq-ədaləti təbliğ və tərənnüm etməsini minnətdarlıqla vurğulayıb: “Siz şüurlu həyatınızı möhtərəm babanızın irsinin, yolunun davamına həsr etmiş, doğmalarınızla birgə Amerikada Azərbaycanın səsi olmusuz.
65 illik tarixə malik Azərbaycan-Amerika Cəmiyyətinin mədəniyyətimizin təbliği, həqiqətlərimizin Amerika ictimaiyyətinə çatdırılmasındakı rolu, diaspor fəaliyyətinə verdiyi töhfələr yüksək qiymətə layiqdir. Təsadüfi deyil ki, Siz ölkəmizin bir sıra orden və medalları ilə təltif olunmusuz. Sizi Azərbaycanda çox sevir, çalışmalarınızı təqdir edirik.
Sizi doğma Azərbaycanda yenidən görməkdən çox şad olduğumuzu bildirir, Mədəniyyət Komitəsi adından bütün uğurlarınız münasibəti ilə təbrik edir, Sizə möhkəm can sağlığı diləyir, ən xoş arzularımızı yetirirəm”!
Amerika-Azərbaycan Cəmiyyətinin rəhbəri Tomris xanım Azəriyə Qarabağ motivli xatirə hədiyyəsi təqdim olunub.
Tomris Azəri səmimi görüş və onun fəaliyyətinə verilən dəyər üçün təşəkkür edib.
