“Azəristiliktəchizat” ASC-nin sədrinin vəzifəsini müvəqqəti icra edən İlham Mirzəliyev 22 sentyabr 2022-ci il tarixində saat 10:00-da Qax şəhərində vətəndaşların qəbulunu keçirib. Qax şəhər Heydər Əliyev Mərkəzində keçirilən vətəndaş qəbulunda Qax, Balakən, Zaqatala şəhərlərinin sakinləri iştirak ediblər. Qəbuldan əvvəl Ümummilli Lider Heydər Əliyevin abidəsi ziyarət edilib, önünə gül dəstələri qoyularaq, əziz xatirəsinə dərin ehtiram ifadə edilib. Daha sonra , şəhərdə qonaq olan “Azəristiliktəchizat” ASC-nin rəhbərliyi Qax şəhərində Heydər Əliyev Mərkəzində olub, Ulu Öndərin zəngin həyat yolunu özündə əks etdirən fotostendlərlə tanış olmuşdur. Mərkəzin əməkdaşları tərəfindən Heydər Əliyev Mərkəzinin fəaliyyəti barədə ətraflı məlumat verilmişdir. Ziyarətdən sonra sakinlər qəbul edilmişdir. Sakinlərin cəmiyyətin fəaliyyət istiqamətlərinə uyğun olan müvafiq müraciətləri cavablandırılıb, qaldırılan bəzi məsələlərin yerindəcə həlli ilə bağlı tədbirlər görülüb, həlli araşdırma tələb edən məsələlərlə bağlı yazılı müraciət qeydə alınıb və aidiyyəti şöbələrin icraatına göndərilib. Sakinlər bölgələrdə vətəndaşların qəbulu və müraciətlərinə baxılması üçün rahat və əlverişli şərait yaradılmasından razılıqlarını dilə gətirərək, göstərilən diqqət və qayğıya görə Prezident İlham Əliyevə minnətdarlıqlarını bildiriblər.
