Avqust ayında Azərbaycan Respublikasının prezidenti İlham Əliyevin Qazaxıstana səfəri baş tutub.
Bu səfər zamanı Qazaxıstan və Azərbaycanın dövlət rəhbərləri İlham Əliyev və Kasım-Jomart Tokayev bir araya gəlib. O bildirib ki, məhdud tərkibdə çox səmərəli görüş keçirilib və bu səfər proqramının əsas məqsədlərindən biri Azərbaycan Respublikasının Prezidenti İlham Əliyevin Qazaxıstan Respublikasının “Altın Kıran” ali ordeni ilə təltif edilməsi mərasimidir. Bundan əlavə olaraq, İlham Əliyevi Qazaxıstanda görkəmli dövlət xadimi və ərazi bütövlüyünün bərpa edilməsinə gətirib çıxarmış şəxsiyyət kimi tanıdıqlarını, ona böyük hörmət və ehtiram bəslədiklərini bildirib. Bu sözlərdən sonra isə Cənab Kasım-Jomart Tokayev Qazaxıstan Respublikası ilə Azərbaycan Respublikası arasında ikitərəfli siyasi, iqtisadi və mədəni münasibətlərin möhkəmlənməsinə və inkişafına xüsusi töhfəsinə görə Prezident İlham Əliyevin “Altın Kıran” ordeni ilə təltif edilməsi haqqında fərman oxuyub və bütün Qazax xalqı adından ehtiram əlaməti olaraq avqustun 24-ü “Altın Kıran” ordenini ona təqdim edib. Daha sonra İlham Əliyev də Qazaxıstan prezidenti Kasım-Jomart Tokayevə onun əməyini yüksək qiymətləndirdiyinə görə öz təşəkkürünü bildirib və qeyd edib ki, bundan sonra da onlar arasındakı dostluq və qardaşlıq münasibətlərinin inkişafına töhfə vermək üçün öz tərəfindən əlindən gələni edəcək. Cənab Prezident bu mükafatı Azərbaycan xalqına hörmət əlaməti olaraq qəbul edib. Ümumiyyətlə, Azərbaycan və Qazaxıstan arasındakı münasibətlər keçmişə dayanır. Bu iki dövləti Prezident İlham Əliyevin də dediyi kimi ortaq tarix və ortaq köklər bir-birinə sıx şəkildə bağlayır. Qazaxıstan və Azərbaycan əvvəllər də olduğu kimi hal-hazırki dövrdə də bir-birini tam şəkildə dəstəkləyir. Bu özünü onlar arasında keçirilən görüşlərdən, bağlanan müqavilələrdən özünü göstərir. Bunu həm iqtisadi həm siyasi həm də digər sahələrə aid etmək mümkündür. Ümid edirəm ki, bu iki dövlət arasındakı dostluq və qardaşlıq münasibətləri uzun müddət davam edəcək.
Azərbaycan Dillər Universiteti
Gülzar Əlizadə
