Azərbaycanın Zəfər savaşı ən yaxın keçmişimizə aid təqvimə bir neçə qürurlu günlər yazdırdı. Şübhəsiz ki, ölkəmizdə belə qürurlu, xoşbəxt günlərdən biri -Zəngilan rayonun işğaldan azad olunmasının ikinci ildönümü qeyd edilir.
Füsunkar gözəlliyi ilə seçilən, ölkəmizin cənub-qərbində yerləşən Zəngilan təbii resursları, həm də tarixi keçmişi ilə mühüm strateji bir mövqedə yerləşir. İşğaldan öncə rayon ərazisində onlarla keçmişimizi ifadə edən və dini-tarixi abidə olmuşdur. Bundan başqa bir sıra faydalı qazıntılar-tikinti daşı, qızıl və qara mərmər yatağı, əhəng xammalı, susuzlaşdırılmış soda üçün əhəng daşı olan rayon ərazisindən 4 çay-Araz, Oxçuçay, Həkəri və Bəsitçay keçməklə Zəngilanı ən bərəkətli rayonlarından birinə çevirmişdi. Təəssüf ki, 1993-cü il oktyabrın 30-da Ermənistan silahlı qüvvələri tərəfindən işğal edilməklə rayonun həm iqtisadi, həm sosial həyatı xüsusi vəhşiliklə dağıdıldı. Rayonun 1 şəhər, 5 qəsəbə və 83 kəndi tamamilə yer üzündən silindi, 45 mindən çox rayon əhalisi məcburi köçkün olaraq respublikanın 43 rayonunda müvəqqəti məskunlaşdı. Erməni vandalizmi nəticəsində rayonun bütün infrastrukturu, tarixi və dini memarlıq abidələri tamamilə talana məruz qaldı.
Bu fikirləri Moderator.az-a Milli Məclisin deputatı, YAP İdarə Heyətinin üzvü Rəşad Mahmudov söyləyib.
Deputat bildirib ki, Müzəffər Ali Baş Komandan İlham Əliyevin rəhbərliyi altında başlayan Zəfər Savaşı nəticəsində Zəngilan rayonundan şərqdə yerləşən Cəbrayıl rayonunda düşmən qüvvələrinə sarsıdıcı zərbə vurulması və 30-dan çox yaşayış məntəqəsinin işğaldan azad edilməsi qəhrəman Azərbaycan Silahlı Qüvvələrinin Zəngilan rayonunun inzibati hüdudlarına çatmasına şərait yaratdı. Nəhayət, Azərbaycan Silahlı Qüvvələri 2020-ci il oktyabrın 18-də Zəngilan rayonunun azad edilməsi uğrunda əməliyyata başladı və oktyabrın 20-də Prezident İlham Əliyev xalqa növbəti müraciəti zamanı Zəngilan rayonunun Havalı, Zərnəli, Məmmədbəyli, Həkəri, Şərifan, Birinci Muğanlı və Zəngilan şəhərinin işğaldan azad edildiyini elan etdi. Zəngilanın azadlığa qovuşması ilə həm də Azərbaycanın İranla dövlət sərhədi tam bərpa edildi.
Beləliklə, azadlığın sevincini yaşayan Zəngilan yeni inkişaf dövrünə qədəm qoydu . Ökəmizin “Böyük Qayıdış” layihəsi məhz bu rayondan start götürdü. Aparılan sürətli bərpa-quruculuq işləri nəticəsində birinci pilot layihə Zəngilanda icra edildi, Ağalı kəndində 200 evdən ibarət gözəl kənd salındı. Bu gün rayonda məşğulluq, məktəb, bağça, tibb məntəqəsi, bütün xidmətlər – “ASAN”, “DOST”, kiçik və orta biznesə dəstək xidmətləri mövcuddur. Geniş quruculuq işlərinin məntiqi nəticəsi olaraq Ağalı dünyanın ən müasir “ağıllı” kəndlərindən birinə çevrilib. Bu prosesdə heç şübhəsiz Prezident İlham Əliyevin xüsusi diqqət və qayğısı önəmli yer tutur. Prezident İlham Əliyevin azad olunmuş Zəngilana mütəmadi səfərlərində rayonun abadlıq-quruculuq işləri hər zaman diqqətdə saxlanmışdır.
Zəngilanın yeni inkişaf mərhələsi yalnız abadlıq-quruculuq işləri ilə yekunlaşmır. Eyni zamanda Zəngilan ölkəmizin beynəlxalq nəqliyyat infrastrukturunda, logistik layihələrdə mühüm yer tutur. Horadiz-Zəngilan-Ağbənd dəmir yolu azad edilmiş torpaqlara həm vətəndaşların gəlməsi, həm də yüklərin daşınması üçün böyük əhəmiyyətə malik olacaq. Zəngilanı Naxçıvanla ayıran cəmi 40 kilometrlik dəhlizin açılması isə uzun illər blokadada olmuş Naxçıvan Muxtar Respublikasını bu şəraitdən çıxarmaqla yanaşı, Azərbaycandan Türkiyə quru yolu ilə yük daşınması baxımdan növbəti tarixi nailiyyət olacaq.
Deputat sonda qeyd edib ki, Müzəffər Ali Baş Komandan kimi ərazi bütövlüyümüz uğrunda Vətən savaşını Zəfərlə başa vuran Prezident İlham Əliyev həmin bölgədə genişmiqyaslı abadlıq-quruculuq işləri ilə yeni dövrün əsasını qoyub. Bu gün işğaldan azad olunmuş ərazilərimiz, o cümlədən Zəngilan bütövlükdə bölgədə analoqu olmayan yaşayış məskəninə çevrilməkdədir. Prezident İlham Əliyevin uğurlu siyasəti nəticəsində Azərbaycan bütün sahələr üzrə inkişaf yolundadır. Bu inkişaf ölkəmizi Prezident İlham Əliyevin qarşıya qoyduğu böyük hədəflərə doğru aparır. Zəngilanın işğaldan azad olunması həm də Azərbaycan ordusunun qüdrəti ilə cənub sərhədlərimizin tam bərpası demək idi. Bu gün ərazi bütövlüyümüz tam təmin edilib və suverenliyimizin keşiyində duran qüdrətli ordumuz var. Qalib ordu və qalib sərkərdə ilə Azərbaycan Respublikası qüdrətli inkişaf yolunu keçir.