ABŞ istehsalı olan HIMARS və Cənubi Koreya istehsalı olan K239 “Chunmoo” Yaylım Atəşli Reaktiv Sistemləri (YARS) qismən Polşanın müdafiə sənayesi sektoru tərəfindən istehsal olunacaq.
Alp.az-ın Ordu.az-a istinadən verdiyi xəbərə görə, noyabrın 9-da Varşavada keçirilən mərasimdə PGZ-WWR şirkəti ilə Polşa Silahlanma Agentliyi arasında raket sistemlərinin bəzi hissələrinin Polşada istehsalına dair çərçivə sazişi müdafiə naziri Mariuş Blaşçak tərəfindən imzalanaraq qüvvəyə minib.
Nazir bildirib ki, Polşa 8×8 təkər formullu “Jelcz” yük maşınlarına quraşdırılacaq ilk K239 raket sistemlərini gələn il əldə edəcək.
Polşada HIMARS və K239 sistemlərində istifadə olunacaq komanda idarəetmə və rabitə sistemləri, PUA-lar, “Jelcz” buraxılış qurğuları, eləcə də kəşfiyyat, sursat və texniki-təmir maşınları kimi alt sistemlərin istehsalı həyata keçiriləcək.
