Soçi görüşü bitər-bitməz Ermənistan Baş naziri Nikol Paşinyan bu gün səhər İrana rəsmi səfərə gedib. Bu səfərlə bağlı erməni mediası maraqlı arqumentlər irəli sürüb. Paşinyanın səfər proqramı isə olduqca maraqlıdır. Bir günlük İrana səfər edən Nikol Paşinyan səfər zamanı Səadabad mədəni-tarixi kompleksində İran Prezidenti İbrahim Rəisi ilə görüşəcək və geri qayıdacaq.
Soçi görüşündə çətin duruma düşən və görüş bitən kimi Nikol Paşinyanın Fransa prezidenti ilə danışması, bunun ardınca İrana səfəri maraqlı detallardan xəbər verir. Belə görünür ki, artıq rəsmi İrəvan Rusiyanın caynağından qurtulmaq üçün son çabalarını göstərir.
Amma Paşinyanın bu taktiki gedişi ona hansı zərbənin dəyəcəyini hesablamayıb. Bir sözlə Nikol Paşinyan səfəri zamanı İran Prezidenti İbrahim Rəisidən dəstək almaq niyyətindədir. Ancaq indiki məqamda İranın Ermənistana hansı dəstəyi verəcəyi də müəmmalıdır. Çünki Rusiyanın güclü təyziqi ilə Qarabağ klanından imtina edən Paşinyan qərbə yönəlik addımları ilə hədəfə çevrilib. Rusiyalı siyasilərin biri-birinin ardınca Paşinyan və komandasına hücumları onu deməyə əsas verir ki, Kreml Paşinyanı bağışlamaq niyyətində deyil. Məhz Soçi görüşündə Nikol Paşinyanın heç bir təklifinin reallaşmaması da bununla bağlı idi. Rusiya siyasətinin iç üzü bəllidir. Rusiya ona xəyanət edən liderləri bağışlamır. Artıq Kremldə bilirlər ki, Nikol Paşinyan Rusiyanın istəklərini yerinə yetirmir və o, cəzalandırılmalıdır. İndi Rusiya da bu cəzalandırma metodunu işə salmağa çalışır. Nikol Paşinyanın İrana tələsik və nəzərdə tutulmamış səfəri də cəzadan qurtulmaq üçün atdığı addımdır. Maraqlıdır, İran Prezidenti İbrahim Rəisi Paşinyanı xilas edə biləcəkmi? Görünən odur ki, Zəngəzur dəhlizinin açılmasının istəməyən İran indi Nikol Paşinyanın himayəçisinə çevrilir. Amma İran anlayır ki, Ermənistan Rusiyanın təsir zonasındadır. Hal- hazırda isə rəsmi Tehran Moskvanın qəzəbinə gəlmək niyyətində deyil. Bir sözlə indi rəsmi İrəvan zərbələrdən yayınmaq üçün yeni minnətçi axtarışındadır. Rəsmi Moskvanın Paşinyanı bağışlamaq niyyəti yoxdur və onun qarşısına konkret tələblər qoyulub. Paşinyanın ya Rusiyanın bu tələblərini yerinə yetirməli, ya da Rusiyanın zərbəsinə hazır olmalıdır.
