Özbəkistanda “Arslon” yeni zirehli transportyorunun yaradılması işlərinin ilkin mərhələsi yekunlaşıb.
Alp.az-ın xəbərinə görə, bu barədə Özbəkistan Müdafiə Nazirliyinin Müdafiə Sənayesi Agentliyi məlumat yayıb.
Xəbərdə bildirilir ki, məhdud maliyyə və sənaye imkanlarına baxmayaraq, Özbəkistan müasir və inkişaf etmiş silahlı qüvvələrin yaradılması üçün səylər göstərir. Bu məqsədlə ölkə müəssisələrində müxtəlif növ silah və texnikalar hazırlanır. Bu yaxınlarda yeni yaradılan “Arslon” zirehli transportyorunun da təqdimatı keçirilib. Onu yaradarkən xarici təcrübə və konsepsiyalar nəzərə alınıb. Bu avtomobil hazırda hərbi sınaqlar mərhələsindədir.
“Arslon” layihələndirməsi Özbəkistanın Krantas Group müəssisəsində həyata keçirilib.
Bu günə qədər “Arslon” zirehli transportyoru bütün lazımi yoxlamalardan keçib və hərbi sınaqlara daxil olub. Hər şey yaxşı olarsa, silahlanmaya qəbul ediləcək.
Sınaqların nə zaman bitəcəyi məlum deyil.
Sifarişçi və tərtibatçı bildirir ki, “Arslon” layihəsi yaradılarkən piyadalar üçün zirehli maşınlar sahəsində ən müasir ideya və konsepsiyalardan istifadə edilib. Bundan əlavə, avtomobil NATO standartları nəzərə alınmaqla hazırlanıb. Xüsusilə, mühafizə parametrləri STANAG 4569 standartına uyğun olaraq müəyyən edilib.
“Arslon” frontal proyeksiya NATO standartının 6-cı səviyyəsinə uyğundur və 30 mm-lik zirehli deşici mərmilərdən qoruyur. Qalan mühafizə 4-cü səviyyədir və 14,5 mm-lik güllələrə tab gətirə bilir. Səviyyə 4a/b minadan qorunma da təmin edilir – təkər və altlıq altında 10 kq trotildən qoruna bilir.
“Arslon”un tam ölçüləri dəqiqləşdirilməyib. Döyüş çəkisi konfiqurasiyadan asılı olaraq 32-35 ton arasındadır.
Zirehli transportyor uzaqdan idarə olunan döyüş modulu – qülləsi ilə təchiz olunub. Modul 30 mm-lik 2A42 top və ya onun ekvivalenti, pulemyot, ehtimal ki, PKT ilə təchiz olunub. Qüllə həmçinin iki blok tüstü qumbaraatanları ilə təchiz olunub.
Modulda optik – elektron stansiya və operator – topçunun uzaqdan idarəetmə sistemindən istifadə olunur.
“Arslon” zirehli transportyorunun ekipajı üç nəfərdən ibarətdir: sürücü, operator-topçu və komandir. Ekipajda standart müşahidə alətləri dəsti var. Korpusun perimetri boyunca videokameralar da quraşdırılıb ki, bu da idarəetməyə kömək edir və situasiya haqqında məlumatlılığı artırır.
Xatırladaq ki, “Arslon” ZTR-in yaradılması prosesində türkiyəli mütəxəssislər iştirak edir. Hələlik, Türkiyə şirkətinin adı açıqlanmayıb.
