“Bu gün artıq iki gündür ki, sərhəddə vəziyyət gərgindir. Hər birimiz bundan narahatıq. Təbii ki, heç kim istəmir müharibə olsun, lakin erməni terrorçuları dayanmaq bilmir. Məni narahat edən digər məqam isə daxilimizdə olan düşmənlərdir. Onlar da az təhlükəli deyillər. İnsanlarımızın və dövlətimizin çətin anından istifadə edərək, cəmiyyətdə çaşqınlıq yaratmağa xidmət edən bu şəxslər birbaşa Azərbaycana xəyanət etməklə məşğuldurlar. Özünü “müxalifət” adlandıran bu partiya rəhbərləri və ya ayrı-ayrı siyasi aktivistlər sosial platformadan Azərbaycanı “işğalçı” adlandırmaqdan belə çəkinmədilər. Həmin şəxslərin məntiqi ilə, Azərbaycan qəfildən ona hücum edən, doğma torpaqlarını minalamaqla məşğul olan terroristlərlə mübarizə aparmamalıdır”.
Bu sözləri Pravda.az-a açıqlamasında Milli Məclisin deputatı Müşfiq Cəfərov deyib.
Deputat bildirib ki, bu gün Qarabağ azad olunub, amma yenə də erməni terrorçuları ilə mübarizə davam edir: “Bu vəziyyət isə şəxsi zəmində dövlətlə düşmənçilik edənlərə fürsət oldu. Onlar birbaşa 3 mindən çox şəhidi olan Azərbaycan Ordusunu işğalçı adlandırdı, bu, birbaşa Ordumuza təhqirdir. Siyasətdə şəxsi maraqlar deyil, yalnız və yalnız milli maraqlara söykənən mübarizə olmalıdır. İndi bu cür çıxış edənlərin əksəriyyəti 90-cı illərdəki hadisələri görüb və yaşayıblar. Həmin illərdə Azərbaycanın hansı təhlükələrlə qarşı-qarşıya olduğunu bilirdilər. Şəxsi zəmində olan düşmənliklər unudulmalı və dövlət üçün, uğruna şəhid verdiyimiz oğullarımız üçün bir olmaq zamanıdır. Bu birliyi pozmağa cəhd edənlər xalqımızın və Vətənimizin düşmənidir”.
M.Cəfərov bütün xalqımızı birliyə, vahidliyə çağırıb: “Mən də daxil olmaqla hər kəs bu Vətəni qorumaqla mükkələfdir. Və qoruyacağıq da, son nəfəsimizə kimi. Bu, həm də şəhidlərimizə borcumuzdur. Qarabağ məsələsi 30 il boyunca həmin şəxslərin əlində ən yaxşı vasitə idi ki, “hakimiyyət torpaqlarımızı azad edə bilmir” deyirdilər. İndi torpaqlar alındı, terrorçular zərərsizləşdirilir, amma “işğalçı” adlandırırlar”.
Deputat əlavə edib ki, biz hər zaman beynəlxalq aləmin haqq savaşımıza qərəzli olduğundan şikayətlənirik: “Bu qərəzin yaranmasında bu qəbildən olan, özünü “siyasətçi “adlandıran şəxslərin rolu olduqca böyükdür. Dünya ictimaiyyəti bizi hər zaman sapı özümüzdən olan baltalarla vurur. Öz şəxsi maraqlarına don geyindirərək Azərbaycan hökümətini dünyada “qəddar”, “insan haqqlarını önəmsəməyən” kimi tanıdıblar”.
