ADEX 4-cü Azərbaycan Beynəlxalq Müdafiə və 13-cü Beynəlxalq Daxili Təhlükəsizlik, Mühafizə və Xilasetmə “Securex Caspian” sərgisinin keçirilməsi ilə bağlı mətbuat konfransı keçirilib.
Alp.az xəbər verir ki, ADEX və “Securex Caspian” sərgilərinin layihə meneceri Ülkər Qasımova deyib ki, sentyabrın 6-dan 8-dək Bakıda keçiriləcək “Securex Caspian” sərgisi hüquq-mühafizə, sərhəd, xilasetmə, yanğınsöndürmə və xüsusi xidmət orqanları üçün ləvazimatların, kompleks mühafizə sistemlərinin və silahların perspektivli modellərini nümayiş etdirəcək beynəlxalq tədbirdir.
Qeyd olunan sərgi Azərbaycan Respublikası Müdafiə Sənayesi Nazirliyi, Dövlət Təhlükəsizliyi Xidməti, Fövqəladə Hallar Nazirliyi, Daxili İşlər Nazirliyi və Dövlət Sərhəd Xidmətinin dəstəyi ilə təşkil olunur. Sərgidə Azərbaycan, Belarus, Çin, İsrail, Koreya Respublikası, Rusiya və digər ölkələrdən şirkətlər təmsil ediləcək.
ADEX və “Securex Caspian” sərgiləri üçün geniş işgüzar proqram hazırlanıb. Sərgilərin keçiriləcəyi üç gün ərzində 4-cü Azərbaycan Beynəlxalq Müdafiə və Təhlükəsizlik Konfransı (pilotsuz sistemlər, kibertəhlükəsizlik, hərbi tibb sahəsində innovasiyalar və sair aktual mövzularda sessiyalar keçiriləcək), hərbi orkestrin çıxışları, hərbi mövzularda VR oyunları və digər tədbirlər təşkil ediləcək.
O deyib ki, bu il ilk dəfə sərgiyə sponsorluq edən şirkətlərin də sayında artım müşahidə edilir. Sərginin baş sponsoru “Jadara Equipment & Defense Systems”, qızıl sponsoru “Turkish Aerospace”, bürünc sponsoru isə “ASFAT” şirkətidir.
Müdafiə sənayesi nazirinin müşaviri Arif Babayev bildirib ki, sərgidə müasir silah növləri ilə təqdim olunacaq. Azərbaycan da özünün yeni silahlarını bu sərgidə nümayiş etdirəcək: “Ümumilikdə Azərbaycan 1000 addan artıq silah-sursat növü istehsal edir. Biz sərgidə bunları nümayiş etdirəcəyik. Sərgidə Azərbaycan istehsalı olan ən müasir pilotsuz uçuş aparatları sərgi iştirakçılarına nümayiş etdiriləcək”.
