Qarabağda atəşkəs vaxtaşırı ermənilər tərəfindən pozulmaqda davam edir. Ötən həftəsonu yenə hərbçimiz şəhid oldu. Dünyanın başının Ukraynaya qarışdığı indiki dövrdə Qarabağ məsələsində durğunluq olacağı iddiaları da var. Bəzi təkliflər var, bildirilir ki, Rusiya Ukraynaya hücum etsə, Azərbaycan da Qarabağda antiterror əməliyyatlarına başlasın. Zatən Azərbaycan Qarabağın yerdə qalan hissəni də işğalçılardan təmizləmək haqqını özündə saxlayır. Gec-tez bu baş verəcək.
Ötən həftə Ermənistan tərəfinin təşəbbüsü ilə Vladimir Putinin Ermənistanın baş naziri Nikol Paşinyanla telefon danışığı olub. Bu barədə şənbə günü Kremlin mətbuat xidməti məlumat verib.
“Ermənistan, Azərbaycan və Rusiya liderlərinin 9 noyabr 2020-ci il, 11 yanvar və 26 noyabr 2021-ci il tarixli üçtərəfli bəyanatlarında təsbit edilmiş razılaşmaların reallaşdırılmasının praktiki aspektləri, o cümlədən Ermənistan-Azərbaycan sərhədinin delimitasiyası və demarkasiyası ilə bağlı məsələlər nəzərdən keçirilib.
ATƏT-in Minsk Qrupu həmsədrlərinin xətti ilə işin davam etdirilməsinin məqsədəuyğunluğu qeyd edilib”, – məlumatda deyilir.
Burada son cümləyə diqqət: Yenə də Minsk Qrupu həmsədrlərini prosesə daxil etmək istəyi var. Sərhədin delimitasiyası və demarkasiyası prosesinə Minsk Qrupunun cəlb edilməsi mümkünmü?
Politoloq Murad Sadəddinov bildirdi ki, Azərbaycan münaqişədən sonra yeni reallıqları nəzərə alaraq öz təkliflərini irəli sürməsi üçün Minsk Qrupu həmsədrlərinə müraciət etmişdi. Lakin bir ildən çox vaxt keçib, Minsk Qrupu həmsədrləri hələ də heç bir təklif irəli sürməyib: “Minsk Qrupunun fəaliyyətini Azərbaycan tərəfi ancaq və ancaq Ermənistan və Azərbaycan arasında postmüharibə, sülh prosesinə dəstək formasında, hər hansı bir humanitar, sosial dəstək formasında görür. Çünki artıq münaqişə başa çatıb və yeni reallıqlar yaranıb. Onların 44 günlük müharibədən öncəki dövrdəki fəaliyyətinin davam etməsi üçün əsas qalmayıb. Bunu Azərbaycan ən yüksək səviyyədə dəfələrlə bəyan edib. Ukrayna böhranına görə, Azərbaycanla Ermənistan arasında sərhədlərin müəyyənləşməsi məsələsində durğunluq olacağını gözləmirəm”.
Sosial Tədqiqatlar Mərkəzinin eksperti Tural İsmayılov da bildirdi ki, Ukrayna-Rusiya qarşıdurmasına görə Qarabağ məsələsi ilə bağlı gedən proseslərdə durğunluq yaranacağı gözlənilmir: “Ötən ilin sonlarında imzalanmış Soçi bəyanatı, ardınca Brüssel bəyanatı özlüyündə hərəkətliliyi ehtiva edir. Hələ ki, Azərbaycan Zəngəzur dəhlizinin açılması ilə bağlı işlərə start verib. Eyni zamanda üç ölkənin işçi qrupu səviyyəsində Ermənistanla Azərbaycanı birləşdirən dəmiryolu və avtomobil nəqliyyatı xətlərinin açılması ilə bağlı proses həyata keçirilir. Paralel olaraq 3+3 formatı çərçivəsində Ermənistanla Türkiyənin münasibətlərinin normallaşması ilə bağlı danışıqlar start götürüb. Bütün bu və digər faktlar, proseslər mövcud olduğu bir zamanda durğunluqdan danışmağa əsas yoxdur. Eyni zamanda Rusiyanın Ukraynaya hərbi hücum edəcəyi də hələ real deyil. Bu il ərzində Rusiyanın Ukrayna ərazisində hərbi əməliyyatlar başlayacağını istisna edirəm. Digər bir məsələ isə ATƏT-in Minsk Qrupu ilə bağlıdır ki, Azərbaycan cəmiyyəti, Azərbaycanın siyasi rəhbərliyi dəfələrlə bu qrupla bağlı narazılığını bildirib. Onların missiyasının artıq başa çatdığını bəyan edib. Eyni zamanda Azərbaycanla Ermənistan arasında münasibətlərin normallaşması ilə bağlı həm Rusiyanın, həm də Türkiyənin müxtəlif görüşləri həyata keçirilir, danışıqlar aparılır. Sərhədlərin delimitasiyası və demarkasiyası məsələsində Azərbaycanla Ermənistan arasında danışıqlar gedir, burada Rusiya vasitəçilik edir. Bu barədə üç ölkə rəhbərinin imzaları var. Yəni bu məsələdə Minsk Qrupuna ehtiyac qalmayıb. Minsk Qrupunun delimitasiya və demarkasiya prosesində iştirakı yolverilməzdir. Minsk Qrupu uzağı hansısa humanitar məsələlərlə bağlı fəaliyyət göstərə bilər. Minsk Qrupu öz mövcudluğunu təsdiqləmək istəyirsə birinci Qarabağ müharibəsində əsir və itkin düşmüş və bu günə qədər taleləri məlum olmayan 4 minə yaxın Azərbaycan vətəndaşının taleyi ilə bağlı Ermənistan qarşısında məsələ qaldırsın”.“Yeni Müsavat”
