Oktyabrın 24-də Azərbaycan Ordusunun Xüsusi Təyinatlı Qüvvələrinin baş giziri, Vətən Müharibəsi Qəhrəmanı Sübhan Rahim oğlu Cəbrayılovun anım mərasimi keçirilib. Bu barədə Alp.az-a millət vəkili Jalə Əhmədova bildirib.
“Salyan Rayon İcra Hakimiyyətinin başçısı Sevindik Hətəmov, şəhidin ailəsi, rayon ictimaiyyəti, ziyalılar, şəhid anaları, qazilərin iştirak etdiyi tədbirdə çıxış edərək qeyd etdim ki, Azərbaycanın suverenliyi uğrunda gedən döyüşlərdə şücaətlər nümayiş etdirmiş Sübhan Cəbrayılov müqəddəs torpaqlarımızı işğalçılardan azad edən və adını zəfər tariximizə qızıl hərflərlə yazan igidlərimizdən biridir. Ali Baş Komandan cənab İlham Əliyevin Sərəncamına əsasən ölümündən sonra bir çox medallarla təltif edilən və ən yüksək fəxri ada – Vətən Müharibəsi Qəhrəmanı adına layiq görülən Sübhan Cəbrayılovun əziz xatirəsi qəlbimizdə əbədi yaşayacaqdır.
Çıxışların sonunda şəhidin döyüş yoluna həsr olunmuş video-çarx nümayiş olundu. Qəhrəmanımızın anım günü ilə əlaqədar xüsusi buraxılmış jurnalda və bukletdə Sübhan Cəbrayılov haqqında xatirələr, igidimizin hərbi xidmət dövrünü və döyüş yolunu əks etdirən məlumatlar da yer almışdı.
Daha sonra tədbir Vətən Müharibəsi Qəhrəmanının adını daşıyan Salyan Peşə Liseyinin qarşısında davam etdi və Sübhan Cəbrayılovun büstünün təntənəli açılış mərasimi keçirildi. ” – deyə millət vəkili qeyd edib.
