Şəhidlər bizim Milli dəyərimizə çevriliblər. Milli dəyərlərimizin iisə kökləri çox qədim,çox dərindir. Bu gün açacağım bir söhbətin içində neçə Milli dəyər görəcəksiniz!
Laçın şəhidi Şahgündüz Cabbarov,onun ailəsi və bu ailənin dar günlərində yanında olan,ona dəstək olan Millət vəkilimiz Mahir Abbaszadə.
Şəhidimiz Şahgündüz Cabbarov şair Kamil Vəfadarın oğludur. 1995-ci ildə Bərdənin Mollalı kəndində anadan olan Şahgündüz musiqi duyumlu,ağıllı,bacarıqlı,dəqiq elmlərə maraqlı bir gənc olaraq yetişir. Azərbaycan Dövlət Neft Akademiyasına qəbul olur. Orada öz tərbiyəsi,istiqanlılığı,gözəl qəlbi ilə tələbə yoldaşlarının,müəllimlərinin hörmətini qazanır. Həm də uşaqlıqdan zəhməti sevməsi,əməksevər olması diqqəti cəlb edirdi.Arzuları böyük idi.
Seçilmək,seçilənlərdən olmaq istəyirdi. Bütün həyatını anasına,onun bütün qayğılarlna həsr etməyi qarşısına məqsəd qoymuşdu.2016-2017-ci illərdə hərbi xidmətdə olub. Orada da fərqlənib,seçilib. Xidmət zamanı döyüş hazırlığı,nizam-intizam nümayiş etdirdiyinə,Vətənə olan borcunu ön xəttə yerləşən postlardan birində layiqincə yerinə yetirdiyinə görə Hərbi Birliyin komandiri Mayis Bərxudarov tərəfindən Fəxri fərmanla təltif olunmuşdu.
Hər zaman torpaqların azad olunacağı günü gözləyir və bu döyüşlərə düşünmədən gedəcəyini deyirdi. Elə də etdi. Döyüşlərə könüllü qoşuldu. Füzulinin,Xocavəndin işğaldan azad olunmasında onun da bir igid olaraq payı olur. 2020-ci ilin oktyabrın 25-də şəhidlik zirvəsinə yüksəlir. Ölümündən sonra “Füzulinin azad edilməsinə görə” və “Xocavəndin azad edilməsinə görə” medalları ilə təltif edilmişdir.
Laçın rayonunun Millət vəkili Mahir Abbaszadə müharibəyə qədər rayon sakinlərinin dərd-sərləri ilə,problemləri ilə hər zaman maraqlanıb onların yanında olub. Müharibədən sonra da şəhid ailələri ilə nəinki maraqlanır daim onların yanında olur. Hər cür maddi və mənəvi köməkliyini bilavasitə göstərir və göstərməkdə davam edir. Onlarla birgə Xiyabanları gəzir,şəhidlərimizi ziyrət eləyir,ailələrinin qonağı olur.
Mahir Abbaszadənin növbəti görüşlərindən biri isə sazlı-sözlü Şahgündüz Cabbarovun ailəsi ilə oldu. Mahir bəy hələ bu görüşə qədər Cabbarovlar ailəsinin sıxıntıları,çətinlikləri ilə yaxından maraqlanıb öz köməyini əsirgəməmişdi. Ailə başcısı Kamil Vəfadar bağlı qapılar arasında cəzasını çəkən zaman oğlu Şahgündüz şəhid olmuşdu. Mahir müəllimin səyləri nəticəsində əvvəlcə şərti sonra isə o azadlığına qovuşdu. Bütün hüquqi tələb və qanunauyğunluqlar çərçivəsində əlindən gələn köməkliyi edərək ailə başçısını öz ailəsinin başına qaytardı. Bu böyük ürək sahibinin ürəyiaçıqlığı bu ailə kimi bütün rayon sakinlərinin də rəğbətini qazanmaya bilməz.
Bizim xalqımız həmişə bir-birinə qarşı diqqətli,qayğılı,səmimi olub. Bir tikə çörəyi neçə yerə bölən olub. “Əl tutmaq Əlidən qalıb” deyirlər. Bu da Milli dəyərdi-tarixi qədim,kökləri dərindən dərin!
Allah bütün şəhidlərimizə rəhmət eləsin! Qəbirləri nurla dolsun! Uca Tanrı qarşısında şəhadətləri qəbul olunsun!
