Ukraynanın “Motor Siç” müəssisəsinin direktoru, “vətənə xəyanət” maddəsilə ittiham olunan Vyaçeslav Boquslayev Rusiyaya təhvil verilə bilər.
Alp.az xəbər verir ki, bununla bağlı Ukrayna mətbuatına açıqlama verən Prezident Ofisinin sözçüsü Mixail Podolyak Boquslayevi əsirlikdə olan ukraynalı hərbçilərlə dəyişməyə hazır olduqlarını deyib.
Məlumat üçün bildirək ki, bir neçə gün əvvəl Ukrayna xüsusi xidmət orqanları tərəfindən həbs olunan Boquslayev, onun rəhbərlik etdiyi müəssisənin istehsal etdiyi mühərrikləri Rusiyaya satmaqda ittiham olunur. Artıq mətbuata ötürülən səs yazılarından məlum olur ki, Boquslayev Rusiyanın yüksək rütbəli məmurları ilə telefon söhbətlərində işğalçı dövlətin tezliklə Ukraynada hakimiyyəti dəyişəcəyinə ümid etdiyini bildirir. Həmçinin, Xorvatiya, Qazaxıstan, yaxud Qırğızıstan vasitəsilə rus ordusuna hərbi vertolyotların mühərriklərini ötürməyə hazır olduğunu deyir. İstintaq artıq müəyyən edib ki, müharibədən əvvəl olduğu kimi, müharibə dövründə də Boquslayev Rusiya ilə sıx əlaqədə olub və zavodda istehsal olunan mühərrikləri işğalçı dövlətin ordusuna ötürüb.
Dəfələrlə Ukraynanın rusiyayönümlü partiyalarından Ali Radaya deputat seçilən bu zavod direktoru Ukraynanın 25 ən varlı adamından biridir və Rusiyanın bu ölkədəki ən nüfuzlu, imkanlı təsir agentlərindən sayılır. Lakin indiyə qədər Ukrayna hüquq-mühafizə orqanları təkzibolunmaz dəlillər əldə edə bilmədiyi üçün onu həbs etmirdi. Mixail Podolyak mətbuata açıqlamasında deyib ki, Boquslayev də Putinin ən yaxın adamlarından biri olan Viktor Medvedçuk kimi ukraynalı hərbçilərlə dəyişdirilə bilər: “Bəli, eynilə Medvedçukla olduğu kimi”.
Xatırladaq ki, Türkiyənin vasitəçiliyilə həyata keçirilən həmin əsir mübadiləsi əməliyyatında Viktor Medvedçuk yüzlərlə “Azov” döyüşçüsü ilə dəyişdirilmişdi.“AzPolitika.info”
