Bu gün “Azərbaycan mətbuatının neçə “əri” var?” başlıqlı yazıda Medianın İnkişafı Agentliyinin və digər aidiyatlı və aidiyyatsız qurumların jurnalistlərə məsləhət verməsini tənqid edən kiçik yanaşmam bəzilərini narahat edib.
Təəssüf ki, bu narahatlıq tənqiddən nəticə çıxarılması ilə nəticələnməyib. Əksinə, MEDİA tərəfindən “təlim” keçmiş həmkarlarımızın özünəməxsus müdafiəsi şəklində ifadə olunub.
Əlahəzrət Medianın İnkişafı Agentliyi, sizin missiyanız mətbuatda jurnalistlər arasında birləşdirici siyasət yürütmək, ömrünün böyük hissəsini bu sahəyə həsr edənlərlə fikir mübadiləsi aparmaq, tənqidləri təhlil etmək, jurnalistlərlə birlikdə mətbuatın inkişafına töhfə verməkdir.
Keçmiş və bayağı metodlardan imtina edin.
Unutmayın ki, Agentliyin divarları arasında hazırlanan və bəzi şəxslərə əks-hücum üçün verilən tapşırıqlar “gözəgirənlərin” ifasında özünü batıran ölüyə bənzəyir.
Onlar sizi hər addımda “baqaja” qoyurlar. Hətta MEDİA-nın hansı əməkdaşı ilə “cavab” taktikasının müzakirə edildiyini və necə təlimat aldıqlarını tam ifşa ediblər. Şəxsən mən peşəkar jurnalist olaraq, bu iş metodunu Agentliyə yaraşdırmıram. Məgər siz, o günə qalıbsınız ki edilən tənqidə praqmatik şəkildə deyil, troll xidmətindən istifadə etməklə cavab verirsiniz?
MEDİA-dan bu sifarişi verən və icra edən “gözəgirənlərə” bir məsləhətim var:
Seçdiyiniz taktika ilə Agentliyi daha da hədəfə gətirirsiniz.
Həmçinin, əminəm ki, Əhməd İsmayılovun da bu özfəaliyyətdən xəbəri yoxdur. Detalları onun da nəzərinə çatdıracağam. Qoy görək, vergi ödəyicilərinin maliyə vəsaitləri ilə formalaşan, büdcədən maaş alan bəzi Agentlik işçiləri niyə bu sahənin xirtdəyə qədər olan problemləri ilə deyil, jurnalistlər arasında intriqa toxumu səpməklə məşğul olurlar?
Ramil Məmmədli
Hərbi ekspert
