XIX əsrdə bu kənddə yerləşmış ermənilər onun adını dəyişib “Aracadzor” kimi rəsmiləşdirmışlər…
Ermənilər hüquqi-inzibati cəhətdən Azərbaycan Respublikasının Kəlbəcər rayonuna aid olan “Araçadzor” adlandırılmış Dovşanlı kəndində Milli Ordumuzun qalib gəldiyi II Qarabağ savaşından sonra normal həyatlarını sürməkdə davam edirlər.
Bunu kəndin qanunsuz “icma rəhbəri” Vaqram Andreasyan Xankəndindəki separatçı nəşrlərə açıqlamasında söyləyib.
“Kənddə hazırda 660 sakin var. 1 dekabr 2020-ci ildən 129 şagirdin təhsil aldığı məktəb və 25 körpənin getdiyi uşaq bağçası da açılıb. Müharibədən sonra kəndə digər ərazilərdən 22 erməni ailə köçürülüb.
İcma binası kənddəki boş evlərdən birində yerləşir. Ziyafət salonumuz yoxdur. Təcili yardım məntəqəsi qəzalı vəziyyətdədir. Kəndə qaz və elektrik enerjisi verilir. Su ilə bağlı problemimiz var, bunun üçün indi kəndə su kəməri çəkilir. Kəndi magistral yolla birləşdirən yol asfaltlanıb”- deyə “icma rəhbəri” bildirib.
V. Andreasyan kənd sakinlərinin işlə təmin olunmasından və gələcək planlarından bəhs edib. O, məşğulluğun əsas istiqamətlərinin heyvandarlıq, əkinçilik, bağçılıq, tərəvəz yetişdirmək, həmçinin, yaxınlıqdakı Kaşen mis-molibden mədənində bəzi işlərlə bağlı olduğunu qeyd edib. Hazırda kənd ot biçini ilə məşğuldur” – xəbərdə belə deyilir.
Zəruri arayış:
Dovşanlı – Kəlbəcər rayonunun eyniadlı inzibati ərazi vahidində kənddir. Xaçın çayının sahilində, Qarabağ silsiləsinin ətəyindədir. XIX əsrdə bu kənddə yerləşmış ermənilər onun adını dəyişib “Aracadzor” kimi rəsmiləşdirmışlər. Tədqiqatçılar Aracadzor oykonimini ermənicə arc və dzor sözlərindən ibarət “ayı dərəsi” mənasını ifadə edən toponim kimi izah etmişlər. Əslində araça/araçı türk dillərində “qoruyucu, keşikçi”, zor/zur “təpə, zirvə” deməkdir…
1917-ci ildə Dovşanlı altı qışlağı olan böyük kənd kimi qeydə alınmışdır. Güman etmək olar ki, bu coğrafi ad dovşanlı nəslinin adı ilə bağlı olub, etnotoponimdir.
1992-ci ildə kəndin keçmış adı yenidən bərpa edilib. Dovşanlı kəndi əvvəllər keçmiş Dağlıq Qarabağ Muxtar Vilayətində Ağdərə rayonu inzibati ərazisinə aid idi, lakin 1992-ci ildə Ağdərə rayonu ləğv edilərək ərazisi qonşu Ağdam, Tərtər və Kəlbəcər rayonları arasında bölüşdürüldü. Dovşanlı kəndi də Kəlbəcər rayonuna birləşdirilən kəndlərdən biridir. Dovşanlı kəndi Qarabağ müharibəsi zamanı 1993-ci ildə Ermənistan Respublikası Silahlı Qüvvələri tərəfindən işğal edilib. 44 günlük savaşdan sonra isə Rusiya hərbi kontingentinin himayəsindəki separatçı-terrorçu erməni rejiminin nəzarətində qalıb…
