Ermənistanın baş naziri Nikol Paşinyan iki ildir Gorus – Qafan şossesinə ayaq basa, Qafana bu yolla gedə bilmir. Bu haqda Ermənistanın Polşadakı keçmiş səfiri Edqar Kazaryan özünün Facebook səhifəsində yazıb. Xatırladaq ki, Gorus – Qafan yolunun Qubadlıdan keçən 23 kilometrlik hissəsinə Azərbaycan nəzarət edir.
“Nikol Paşinyan 2020-ci il yanvarın 25-də Qafanda KİV-lərin suallarına cavab vermək üçün fiziki imkanlara malik idi. O vaxt o hələ bizim Vətənimizi məhv etməyə, kapitulyasiya barədə bəyanatı imzalamağa, Vaqarşak Arutyunyana (keçmiş müdafiə naziri) geri çəkilmək əmri verməyə və Gorus – Qafan yolu üzərində nəzarəti azərbaycanlılara verməyə imkan tapmamışdı. O vaxt onun Gorusdan Qafana getmək, çoxsaylı jurnalistlər qarşısında “cəsarət” nümayiş etdirmək imkanı vardı. Cəmi iki il sonra onun Gorus – Qafan yolu ilə Qafana qədər getmək imkanı olmadı. Çünki bu müddət ərzində dövləti dağıtdı, torpaqları verdi, özünə yüz milyonlarla dollarlıq yeni zirehli avtomobillər aldı və yüzlərlə mühafizəçinin, polisin müşaiyəti ilə cəmi bir jurnalistin qarşısında iki saatlıq düşməncəsinə nitq söyləmək üçün özünün yeni təmirdən çıxmış iqamətgahına getdi”, – Kazaryan yazır.
