“Yüksək Dəqiqlikli Komplekslər” holdinqinin “Kurqanmaşzavod” müəssisəsi yeni “Karakal” yerüstü döyüş robotu hazırlayıb.
Alp.az-ın məlumatına görə, “Poliqon” “Yüksək Dəqiqlikli Komplekslər”ə istinadən xəbər verir ki, yüngül sinifli döyüş robotu olan “Karakal” ilk dəfə “Army-2024” beynəlxalq hərbi-texniki forumunda təqdim edilib.
Bildirilib ki, müxtəlif əməliyyatların yerinə yetirilməsi üçün uyğunlaşdırıla bilən “Karakal” robotu tırtıllı şassiyə malikdir. Robot uzaqdan idarəetmə sistemi ilə təchiz olunub. Bu idarəetmə sisteminin tərkibinə kameralar, termal görüntü cihazı, naviqasiya sistemi və elektron müdaxiləyə davamlı radio ötürücü daxildir.
Sözügedən sistem sayəsində “Karakal”ı gecə də daxil olmaqla 2 km-ə qədər məsafədə idarə etmək mümkündür ki, bu da robotun imkanlarını xeyli genişləndirir. “Karakal”ın yükgötürmə qabiliyyəti 500+ kiloqram, hərəkət mənzili isə 150 kilometrdir. Həmçinin robota müxtəlif təyinatlı avadanlıqlar da quraşdırıla bilər.
