Xəbər verdiyimiz kimi, oktyabrın 21-də Ermənistanın Qafan şəhərində İranın Baş konsulluğunun açılışı olub. Elə həmin gün Ermənistan tərəfi Azərbaycanın mənəvi paytaxtı sayılan Təbriz şəhərində konsulluq açacağı və İranın buna razılıq verdiyi barədə rəsmi məlumatlar yayıldı.
Qeyd edək ki, Azərbaycan öz müstəqilliyini bərpa etdikdən bu günə kimi İranla münasibətləri nəzərə alaraq, İsraildə diplomatik nümayəndəliyini açmayıb. Bəs, ölkəmizə qarşı riyakar siyasət yürüdərək Zəngəzur ərazisində konsulluq açan və Təbrizdə Ermənistana konsulluq açmasına icazə verən İrana cavab olaraq Azərbaycan İsraildə səfirlik açmalıdırnı?
Mövzu ilə bağlı Redaktor.az-a danışan Azərbaycanın keçmiş xarici işlər naziri Tofiq Zülfüqarov bildirdi ki, Azərbaycan çoxdan İsraildə səfirlik açmalı idi:
“Mən onun tərəfdarı deyiləm ki, biz bunları bir-biriylə bağlayaq. Mən çoxdan bu fikirdəyəm ki, biz İsraildə səfirlik açmalıyıq. Həm bizim əlaqəlirimizin yüksək səviyyədə olması, həm də diplomatik baxımından inkişaf etdirmək üçün səfirlik bizə çox yaxşı bir vasitə olacaq.
“Onlar ediblər, biz cavab verdik”, hesab edirəm ki, bu məntiqlə bu mövzuya yanaşılmamalıdır. Amma ümumiyyətlə, səfirlik bizə orada lazımdır.”
