“İranın molla rejimi cəhənnəmə tək getmək istəmədiyi üçün Ermənistandan “müqəddəs aftafa” qismində istifadə edir”

Vətən Müharibəsindən sonrakı dövrdə İranın Azərbaycan qarşı qeyri-dost münasibəti hər gün özünü daha qabarıq biruzə verir. İşğalçı Ermənistan xaric, bütün qütblərdə yerləşən dövlətlərlə müsbət münasibətlərə malik olan Azərbaycanın artan nüfuzu İrandakı molla rejiminin yuxusunu ərşə çəkib.

İranın Ermənistan sevgisi 1990-cı illərdən hamıya yaxşı məlumdur. Həmin illərdən Ermənistana silah, sursat, medikament və yanacaq verən İran, Vətən Müharibəsi zamanı eynisini etdi və əlavə olaraq səmasını və quru yollarını işğalçı İrəvan hakimiyyəti üçün daim açıq saxladı.

İran terroru dəstəkləyən azsaylı ölkələrdən biridir və bu kontekstdə Tehranın 13 terror təşkilatı ilə yaxından əməkdaşlıq edən Ermənistanla eyni “yataqda” olması təəccüblü deyil. Necə deyərlər, su axıb, çuxurunu tapıb. İranın bu günə qədər dəstək verdiyi və yaxından əməkdaşlıq etdiyi Suriya, Ermənistan, Yəmən, Şimalı Koreya kimi ölkələrin, Fələsin müxtariyyətinin, Hizbullah, Həmas və husilər və s. kimi silahlı qruplaşmalırın hansı məqsədlərə qulluq etdiyi və hansı vəziyyətdə olduqları hamıya yaxşı məlumdur.

İranın molla rejimi cəhənnəmə tək getmək istəmədiyi üçün islam dinin düşmənləri olan Ermənistan hakimiyyətini hərdən yataqdan çıxarıb “müqəddəs aftafa” qismində də istifadə edir. Başqa sözlə desək, İranın dəstək verdiyi istənilən ölkəyə (qruplaşmaya) digər düşmən (rəqib) lazım deyil.

Bu aksioma hər tərəfdən, o cümlədən İrana da, hər tərəfdən türklərlə əhatə olunan Ermənistan üçün daha keçərlidir. Regionda və dünyada başlayan yeni dəyişiklər, formalaşan yeni reallıqlar zamanla daha da geniş coğrafiyanı əhatə edəcək, bu reallıqlar nə şər yuvası İrandan, nə də işğalçı Ermənistandan yan keçməyəcək.

Türkiyə və Azərbaycanın bütün türk dünyasını birləşdirmək və inkişaf etdirmək istiqamətində atdığı addımlar, bu birliyə qarşı çıxan və ya ona qısqanclıqla yanaşan qüvvələrin birmənalı məğlubiyyəti ilə nəticələnək.

İranın 44 günlük müharibə zamanı Azərbaycan qoşunlarının Araz boyu istiqamətdə irəlləməsinə maneə törətməsi, müharibədən sonra isə Azərbaycanla sərhəddə müxtəlif hərbi təlimlər keçirməsi kimi faktları molla rejiminin Azərbaycanın əldə etdiyi Qələbədən nə qədər dərindən narahat olduğunu  nümayiş etdirir.

İranın okeanları və ya heç olmasa Hörmüz boğazını boş qoyub, 5-10 sınıq-salxaq zirehli və zirehsiz maşınla Azərbaycan sərhədlərində aşağı yuxarı şütüməsi, Arazın İran ərazisindəki motosikletlə keçilə bilən 50 sm dərinliyindəki qolu üzərində panton körpüsü quraşdırması, hərdən isə təlimdə öz hədəflərini məhv etməsi, Azərbaycan-Türkiyə-Orta Asiya-Çin-Pakistan vektorunun inkişafı proseslərinə nə mane ola bilər, nə də buna maneə yarada bilər. Odur ki, İranın sərhəddimizdəki təlimlərinın Azərbaycanın nə türk dünyası ilə, nə müttəfiqləri ilə, nə də Zəngəzur  və Qarabağla bağlı planlarna təsir edə bilməz.

Bunların səbəbləri də sadədir. Birincisi, İran rejiminin ona qarşı səsini çıxaran türk fəalları həbslərə ataraq ermənilərlə əməkdaşlığa üstünlük verməsi, Cənubi Azərbaycan Respublikasının yaranmasının qarşısını artıq ala bilmir. İkincisi İran rejimi son mitinqlərdən ciddi narahatlıq keçirir və tələblərin yerinə yetirilməsi istiqamətində ciddi addımlar atır. Üçüncüsü, Arazın hər iki tayındakı Azərbaycan türkləri, heç bir zaman molla rejiminin azərbaycanlılara qarşı ayrı-seçkilik siyasətini, işğalçıya dəstək taktikasını, rəsmi Bakıya qarşı iddia və hədələrini bağışlamayacaq.

İrandakı azərbaycanlılar həmişə 300 milyonluq türk dünyasının tərkib hissəsi olaraq daim Cənubi Azərbaycan müstəqil dövlətini yaratmaq üçün fasiləsiz olaraq mübarizə aparırlar. Səttarxan, Xiyabani, Pişəvari tərəfindən həyata keçirilən hərəkatların mərkəzi daim Təbrizdə yerləşib. Təbriz isə artıq oyanıb. Bunu İran rejimi mütləq nəzərə almalıdır.

Azərbaycanı “dəhşətli fenomen və İran üçün potensial təhlükə” adlandırarkən, Ermənistanı Azərbaycandan daha prioritet qonşu təyin edərkən və Türkiyəni “strateji rəqib” olaraq hədəf seçərkən molla rejimi doğrudanmı İranda yaşayan 30 milyonluq türklərin, sərhəddindəki Azərbaycan, Türkiyə və Pakistanın qarşılıqlı strateji tərəfdaşlığını və mövcud münasibətlərin ən üstün səviyyədə olduğunu anlamır? Yoxsa anlamaq istəmir?

Nə isə. Anlamayanı anlatmaq, anlamaq isəməyəni isə adam etmək savabdır…moderator.az