İranda bir neçə gün öncə 22 yaşlı Məhsa Əmininin ölümündən sonra başlayan etirazlar davam edir.
Alp.az-ın məlumatına görə, sentyabrın 21-i gecə davam edən etirazlarda hökumət qüvvələri vətəndaşlara birbaşa atəş açıb.
İnsan haqları təşkilatlarının məlumatına görə, etiraz aksiyaları zamanı ən azı 10 nəfər polisin birbaşa açdığı atəş nəticəsində öldürülüb. Sentyabrın 22-də güllələnərək öldürülən daha iki nəfərin kimliyini dəqiqləşdirmək mümkün olub.
Kirmanşahda Minu Məcidi adlı orta yaşlı qadın xüsusi təyinatlıların atəşi nəticəsində həyatını itirib və onun cənazəsi ailəsinə təhvil verilməyib. Ötən gecə Qərbi Azərbaycan əyalətinin Üçnova (Üşnəviyə) şəhərində xüsusi təyinatlıların əhaliyə açdığı atəş nəticəsində 27 yaşlı Sədrəddin Litani həlak olub. Onunla birgə çox sayda insanın güllə yarası aldığı, onlardan üçünün durumunun ağır olduğu qeyd olunur.
İran rəsmiləri dünən 7 etirazçının öldürüldüyünü təsdiq edib, onların ölümünün şübhəli şəraitdə baş verdiyini iddia ediblər.
Xatırladaq ki, ailəsi ilə Tehrana qohumlarını ziyarətə gedən 22 yaşlı qız Məhsa Əmini həbs olunub. O, əxlaq polisinə təhvil verildikdən bir neçə saat sonra komaya düşüb və xəstəxanada dünyasını dəyişib. Şahidlər, ailə və xəstəxana hesabatları gənc qadının təbii səbəblərdən ölümünü inkar edirlər.
