Xəbər verdiyimiz kimi 2021-2022-ci tədris ilindən bütün ümumi təhsil müəssisələrinin 9-cu siniflərində “Zəfər tarixi” kursunun tədrisinə başlanacaq. “Zəfər tarixi” kursu tədris dilindən asılı olmayaraq, bütün siniflərdə dövlət dilində-Azərbaycan dilində 1 saat dətris olunacaq.
Moderator.az-ın əməkdaşı bu barədə ekspertlərin fikrini öyrənib.
Professor Şahlar Əsgərov “Zəfər tarixi” kursunun məktəblilərimiz üçün faydalı ola biləcəyini deyib, amma tarixin tədrisiylə bağlı problemlərimizin olmasını da istisna etməyib:
“Tarix mürəkkəb məsələdir. Ümumiyyətlə, tarixin tədrisi məsələsi Azərbaycanda mənə elə gəlir ki, düz qurulmayıb. Tarix dərsi beşinci sinifdən və qədimdən başlayır və yuxarı siniflərə gedir. Yəni beşinci sinif qədim tarixi öyrənir, halbuki bu düzgün deyil. Çünki nə evdə, nə də televizorda bu haqda şagird heç nə eşitməyib deyə onun üçün qədim tarixi öyrənmək çətin olur. Hesab edirəm ki, bunu ona görə belə yazıblar ki, bizim kimi bir vaxt əsarət altında olan xalqlar öz tarixini sevməsin və öyrənməsin. Ona görə gəlib 10-11 sinifdə bu günki tarixi keçirlər. Bu da yuxarı sinif şagirdlərinə maraqlı olmur. Bunun səbəblərindən biri də odur ki, heç bir azərbaycanlı öz tarixi haqda dolğun məlumata malik deyil. Düşünürəm ki, tarix bu gündən öyrənilməlidir. Yəni beşinci sinifdə müstəqil Azərbaycan, Sovet və sonda, 11-ci sinifdə Qədim dünya tarixini tədris etmək lazımdır ki, o şagird bilsin ki, üç min il bundan qabaq biz burda yaşamışıq. Tarix mənə elə gəlir ki, bizdə düz öyrənilmir. Ona görə bizdə tarixə baxış düz deyil. Qaldı ki, “Zəfər tarixi” kursunun isə məktəblərdə tədris olunması hesab edirəm ki, çox faydalı ola bilər.
Bir neçə il öncə mən irad tutub bildirirdim ki, milli pulun üzərində xəritə çəkməzlər. Xəritə o deməkdir ki, yəni bizim ərazimiz budur. Amma sabah sən qüdrətlənib ərazini böyüdə də bilərsən. Məsələn, 44 günlük Vətən müharibəsində 9 noyabr sazişi bağlanmasaydı, ordumuz vurub keçəcəkdi. Bununla Zəngəzurun bir hissəsini də işğaldan azad edərdi. Ona görə də güman edirəm ki, tarixin tədrisi Azərbaycandakı problemlərdən biridir”.
Professor Firudin Cəlilov da “Zəfər tarixi” kursunun tədrisinin gənc nəsil üçün faydalı ola biləcəyini dedi:
“Düşünürəm ki, həm “Zəfər tarixi” kitabının yazılması çox önəmlidir, həm də onun məktəblərdə dərslik vasitəsi kimi istifadə olunmasına çox böyük ehtiyac var. Çünki mən Azərbaycan tarixiylə 30-40 ildir ki, məşğulam və bu tarixdə 44 günə belə böyük qələbə əldə olunmayıb. Xüsusilə son yüz ildə Azərbaycanın torpaqları həmişə işğal olunub. Dağıstan, Borçalı, İrəvan, Zəngəzur və sair yerlər verildi. Bu kondeksdən götürəndə 44 günlük savaş Azərbaycan tarixində son yüz ilin qızıl hərflərlə yazılası bir tarixidir. Gənclərimizdə vətənpərvərlik, vətən sevgisi aşılamaq, millətimizin özgüvənini yüksəltmək üçün “Zəfər tarixi” kursunun tədrisinə çox böyük ehtiyac var. Əgər belə bir istək varsa, mən bunu ancaq dəstəkləyirəm və uğur arzulayıram”.
