“Biz bir neçə ay ərzində sülh sazişini yekunlaşdırıb imzalaya bilərik. Ermənistan tərəfi eyni iradə nümayiş etdirsə, zənnimcə, bu, real görünür”. Bunu Azərbaycan Prezidenti İlham Əliyev İtaliyanın “İl Sole 24 Ore” qəzetinə müsahibəsində bildirib. Digər tərəfdən də Ermənistanın Kəlbəcərdə təxribat törətməsi xəbəri sual yaradır ki, bu sülh sazişi həqiqətən bir ay ərzində reallaşa bilərmi?
Mövzu ilə bağlı açıqlama verən Milli Məclisin deputatı Ceyhun Məmmədov bildirdi ki, Brüsseldə əldə olunan razılığa əsasən, yekun sülh müqaviləsi imzalanmalıdır:
“Ermənistan baş naziri Nikol Paşinyan da Nazirlər Kabinetinin iclasında bu məsələyə toxundu. Azərbaycan da bu istiqamətdə çalışır. Amma buna baxmayaraq, biz dəfələrlə Ermənistanın Kəlbəcərdə atəşkəsi pozmasını müşahidə etmişik. Bütün hallarda sülh sazişinin imzalanması istiqamətində Azərbaycan səylərini davam etdirməlidir. Çünki bu sülh müqaviləsi ilə Ermənistan üzərinə müəyyən öhdəliklər götürmüş olacaq. Bu da keçmiş münaqişənin tənzimlənməsinə öz töhfəsini verəcək”.
Millət vəkilinin sözlərinə görə, Ermənistan təxribatlarının hələ də davam etməsinin bir neçə səbəbi var:
“Birincisi, Paşinyan Ermənistan ordusuna nəzarət edə bilmir və bu ordu da olan bəzi zabitlər təxribatlara davam edirlər. İkincisi, Azərbaycana müəyyən təyziqlər etmək üçün Ermənistan belə yollara əl atır. Ümumilikdə Ermənistan bu təxribatlara davam edəcək və bizdə buna hər an hazır olmalı, adekvat cavabı verməliyik. Yekun sülh müqaviləsinin imzalanması üçün də tərəflər səylərini davam etdirməlidirlər. Ordumuz daha da gücləndirilməli, beynəlxalq müstəvidə Ermənistanı ifşa etməyə davam etməli, Azərbaycan həqiqətlərini təbliğ etməliyik. Çox ağır və mürəkkəb bir dövrə qədəm qoymuşuq. Ermənistan hələ də 44 günlük müharibədən sonra özünə gələ bilməsə də yenə hansısa iddiaları irəli sürür, təxribatlara davam edir. Bunun qarşısını da alacaq. Bu, uzun və mürəkkəb prosesdir. Azərbaycan məqsədinə nail olmaq üçün bütün addımları atmaqda davam edəcək”.
