Qorxmaz Əlizadə 1995-ci il yanvarın 27-də Qax rayonunun Cəlayir kəndində anadan olub. 2002-2010-cu illərdə R.İbrahimov adına Cəlayir kənd orta məktəbində, 2010-2013-cü illərdə isə Cəmşid Naxçıvanski adına Hərbi Liseydə təhsil alıb. 2013-2017-ci illərdə Heydər Əliyev adına Azərbaycan Ali Hərbi Məktəbində (AAHM) “Kəşfiyyat və Quru Qoşunları” ixtisası üzrə ali hərbi təhsil alaraq “leytenant” hərbi rütbəsi alıb və 2017-ci ildən hərbi xidmətə başlayıb.
Azərbaycan Ordusunun baş leytenantı olan Qorxmaz Əlizadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Komandiri olduğu dəstə ilə birgə Ermənistanın nəzarətində olan dörd postun alınmasında, erməni ordusunun bir sıra hərbçilərinin əsir götürülməsində xüsusi fərqlənib. Erməni hərbçisinin əsir götürülməsi zamanı əlbəyaxa davada zədələnməsinə baxmayaraq hospitala yollanmaqdan imtina edib.
Qorxmaz Əlizadə oktyabrın 17-də Füzuli rayonu istiqamətində gedən döyüşlərdə snayper gülləsi nəticəsində şəhid olub. Şəhid zabitimizin ölümündən 13 gün sonra oğlu doğulur. Şəhid zabitimizin sağlığında oğlum doğulsa Fateh adı verin deyir. İndi Qorxmaz Əlizadənin ocağında bir igid, Fateh böyüyür.
Qax rayonunda dəfn olunub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirən Qorxmaz Əlizadə Azərbaycan Respublikası Prezidentinin müvafiq Sərəncamları ilə ölümündən sonra “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif olunub.
