Avropa İttifaqı Şurasının Prezidenti Şarl Mişelin təşəbbüsü ilə 14 dekabr 2021-ci il tarixində Brüsseldə Azərbaycan Respublikasının Prezidenti İlham Əliyev və Ermənistan Respublikasının baş naziri Nikol Paşinyanın üçtərəfli görüşünün, habelə Azərbaycan Respublikası Prezidenti ilə Avropa İttifaqı Şurasının Prezidenti arasında keçirilmiş ikitərəfli görüşün nəticəsi olaraq, humanizm prinsiplərinə sadiqliyinin təzahürü kimi Azərbaycan 19 dekabr 2021-ci ildə 10 nəfər erməni əsilli hərbi qulluqçunu Avropa İttifaqının vasitəçiliyi ilə Ermənistan tərəfinə təhvil verib.
Maraqlı məqam isə, erməni əsirləri İrəvana aparan şəxslə bağlıdır. Alp.az xəbər verir ki, hər dəfə erməni əsirləri İravana aparan rusiyalı general Rüstəm Muradov bu dəfəki missiyada iştirak etməyib.
Hərbi ekspert Ədalət Verdiyev erməni əsirlərin İrəvana kim tərəfindən aparıldığını Alp.az saytına açıqlayıb.
Hərbi ekspert bildirib ki, bu dəfəki hərbi əsirləri Avropa İttifaqının nümayəndəsi aparıb.
“Artıq görünən odur ki, Rüstəm Muradovu Aİ-dən Tovio Klaar əvəz edib. Çünki bu dəfə əsirlərin İrəvana çatdırılması missiyası Tovio Klaara həvalə edilib. Əsirlərin də vəziyyəti çox yaxşıdır.”- deyə hərbi ekspert bildirib.
Görünən odur ki, artıq Rusiya bu missiyadan kənardadır. Qeyd edək ki, bu günə qədər əsirlərin dəyişdirilməsi missiyasına Rusiya vasitəçilik edirdi.
