Dünən Milli Məclisin Əmək və sosial siyasət komitəsində “Əmək pensiyaları haqqında” Qanunda dəyişiklik edilməsi barədə birinci oxunuşda müzakirə edilən qanun layihəsi pensiya islahatlarının davamı kimi pensiya artımlarının vahid indeksasiyası metodunun tətbiqinin genişləndirilməsi və habelə 2022-ci ildə əmək pensiyaçılarına ödənilən maddi yardımın 2023-cü il yanvarın 1-dən etibarən pensiyaların tərkibinə daxil edilməsi istiqamətləri üzrə hüquqi bazanın yaradılmasını özündə ehtiva edir.
“Əmək pensiyaları haqqında” Qanun layihəsi pensiya təminatı sistemində sosial sığorta prinsipinin daha da möhkəmləndirilməsinə, pensiyaların inflyasiyanın mənfi təsirlərindən qorunmasına və əhalinin böyük bir təbəqəsinin sosial müdafiəsinin daha da yüksəldilməsinə xidmət edir. Təklif olunan vahid indeksasiya metoduna keçid qulluq stajına görə əlavə almaq hüququ olan şəxslərin pensiyasının əvvəlki metoda nisbətən daha çox artmasına, onların sosial rifahının yaxşılaşmasına kömək edəcəkdir. Eyni zamanda,dəyişikliklərə əsasən, bütün növ əmək pensiyalarının məbləğləri hər il vahid qaydada indeksləşdirilərək artırılacaq və pensiyaların indeksləşdirilərək tamamilə elektronlaşdırılması mümkün olacaqdır.
Layihənin pensiya alan bütün şəxsləri tam əhatə etməsi dövlətimizin və hökumətimizin əhalinin sosial müdafiəsini daimi diqqət mərkəzində saxladığının yeni bir təsdiqidir.
Səbinə XASAYEVA,
Milli Məclisin deputatı
