Müdafiə Nazirliyinin 4 hərbçisi 10 milyon manatlıq mənimsəmədə ittiham olunaraq həbs olunub. Dövlət Təhlükəsizliyi Xidməti (DTX) Müdafiə Nazirliyində (MN) keçirdiyi əməliyyat nəticəsində Maliyyə İdarəsinin rəisi Rafael Xəlilov, N saylı hərbi hissənin maliyyə şöbəsinin rəisi Fəzail Əliyev, Quru Qoşunlarının maliyyə idarəsinin rəisi Bayram Bayramov və maliyyə idarəsinin zabiti Vüsal Ədalət oğlu Əlizadə tutulublar. Onlar barəsində 4 aylıq həbs qəti-imkan tədbiri seçilib. Onlara Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə ittiham verilib.
İstefada olan polkovnik Şair Ramaldanov deyib ki, Dövlət Təhlükəsizliyi Xidmətinin Müdafiə Nazirliyində aşkar etdiyi hallar, yeyintidən daha çox, vəzifəli şəxslərin hərbi xidmətə xəyanəti kimi qəbul edilməlidir: “Hərbiçi and içir və üzə çıxanlar hərbi anda xəyanətdir. Xüsusən Vətən müharibəsindən sonra cəmiyyətdə hərbi xidmət müsbət qəbul edilməkdədir. Həyata keçirilən əməliyyat sıradan bir əməliyyat deyil. Müdafiə Nazirliyində korrupsiyaya bulaşmış şəxslər artıq saxlanılıb. Bu əməliyyatı müəyyən bir şəkildə orduda həyata keçirilən islahatlarla əlaqələndirirəm. Azərbaycan Ordusunda islahatlar gedir. İslahatlar ancaq yeni hərbi şəhərciklər, yeni hərbi hissələrin yaradılması ilə məhdudlaşmır. Azərbaycan Silahlı Qüvvələri Türkiyə ordu modelinə keçirilir. Bütün istiqamətlər üzrə islahartlar gedir. Müdafiə Nazirliyində belə faktların ortaya çıxarılmasını da bu baxımdan islahatların nəticəsi hesab edirəm”.
Şair Ramaldanov hesab edir ki, islahatlar həm də ordudakı sağlam olmayan bütün münasibətləri ortaya çıxaracaq: “Maliyyə Xidməti daha çox icraçıdır. Maliyyə Xidmətində xidmət edən vəzifəli şəxslərin bu qədər pulu mənimsəməsi üçün şəraiti kim yaradıb? Bu şəxslərin arxasında kim dayanıb? İstintaq orqanı, o cümlədən Müdafiə Nazirliyinin rəhbər vəzifəli şəxsləri bu məsələlərə müəyyən bir şəkildə aydınlıq gətirəcəklər”.
Şair Ramaldanov deyib ki, belə halların ortaya çıxarılması Azərbaycan Ordusunda aparılan islahatların məntiqi nəticəsidir.
“Müdafiə Nazirliyi kimi qapalı qurumlarda belə halların çiçəklənməsinə göz yummaq olmaz”
Deputat Fazil Mustafa deyib ki, Dövlət Təhlükəsizliyi Xidməti tərəfindən həyata keçirilən əməliyyat cəmiyyətdə müsbət qarşılanıb:
“Müdafiə Nazirliyi ilə bağlı cəmiyyətdə müxtəlif fikirlər səslənir. Mediada, sosial şəbəkələrdə 44 günlük Vətən müharibəsi dövründə bəzi hərbçilərin fəaliyyətləri tənqid olunur. Ordudakı yeyintilərlə bağlı da vaxtaşırı fikirlər səsləndirilir. Hesab edirəm ki, bu istiqamətdə davam edən bir tendensiya olacaq. Bu adamların ifşa olunması, yeyintilərin üzə çıxarılması müsbət haldır. Ümid edirəm ki, ordumuzun gələcəyi ilə bağlı məhz bu cür addımların atılması, ən azı cəmiyyətdə ordumuza etibarın artması baxımından, Müdafiə Nazirliyi strukturlarında təmizləmələrin aparılması baxımından faydalıdır. Müdafiə Nazirliyi kimi qapalı qurumlarda belə halların çiçəklənməsinə göz yummaq olmaz. İcra hakimiyyətlərində, digər açıq nazirliklərdə belə halların baş verməsindən əvvəllər danışmışıq. Müdafiə Nazirliyində belə əməliyyatın keçirilməsi cəmiyyətdə müsbət qarşılanır. Orduda neqativ halların qarşsının alınmasını müsbət tendensiya kimi dəyərləndirirəm”.“Yeni Müsavat”
