Azərbaycan Dövlət Sərhəd Xidmətinin rəisi general-polkovnik Elçin Quliyev mərhum hərbi jurnalist Rəşad Süleymanovun ailəsi ilə görüşüb.
Alp.az-ın məlumatına görə, general-polkovnik Elçin Quliyev Rəşad Süleymanovun övladlarının qayğısı ilə maraqlanıb.
“Poliqon” (“Azeri Defence”) jurnalının yaradıcısı və baş redaktoru olmuş mərhum Rəşad Süleymanov hərbi jurnalistikamızda silinməz izlər qoymuş, hərb və müdafiə sahəsində ixtisaslaşan az saylı jurnalistlərdən biri idi. Onun yüksək peşəkarlığı və istedadı jurnalistika cameəsində daim yüksək qiymətləndirilirdi.
Uzun illər mətbuat sahəsində çalışan və onun inkişafında xüsusi xidməti olan Rəşad Süleymanov fəaliyyəti dövründə Azərbaycanın region-dost ölkələri ilə, xüsusilə də Türkiyə-Azərbaycan müdafiə sənayesi əlaqələrinə böyük töhfə verib.
Rəşad Süleymanov hərbi jurnalist kimi həmişə dövlətimizin, ordumuzun yanında olub. 2014-cü ilin avqust hadisələrində, 2016-cı ilin Aprel döyüşləri zaman Müdafiə Nazirliyi ilə, 2019-cu ildə Qazax rayonu istiqamətində dövlət sərhədində baş verən lokal döyüşlər zamanı Dövlət Sərhəd Xidməti ilə koordinasiyalı şəkildə işləyərək ictimaiyyətin dəqiq, qərəzsiz informasiyalarla təmin edilməsində iştirak etmişdi.
Döyüşlər, döyüş zonasında davranış, informasiyaların əldə edilməsi, yayılması və idarə olunması istiqamətində qazandığı təcrübəni Vətən müharibəsində də bölüşmüşdür. Bir vətəndaş, jurnalist olaraq həlledici məqamda dövlətimizə, xalqımıza fayda vermiş, bu müqəddəs missiyada yaxından iştirak etmişdir.
Xatırladaq ki, Rəşad Süleymanov 2020-ci il dekabrın 15-də COVID-19 virusundan vəfat edib.
Allah rəhmət eləsin, 3 övladı bizə əmanətdir.
